Meeqqat atuarfianni atuartumut ataatsimut aningaasartuuteqarnerulerneq

Meeqqat atuarfianni atuartuuteqarneq ukiumiit ukiumut akisuneruleriartorpoq. Meeqqat atuarfianni atuartumut ataatsimut aningaasartuutigineqartartut ukiut qulingiluaannaat ingerlaneranni 32,1 procentimik qaffariarsimapput, 2019-imilu 96.985 koruunisut annertutigilersimallutik.

Ilinniartitaanermut Naalakkersuisoqarfik Nivi Olsenip Demokraatineersup paragraf 37 naapertorlugu apeqqutaanut akissuteqaniarluni lommeregneri atorlugu ulapissimavoq, meeqqallut atuarfeqarneranni kisitsisinik pingaarutilinnik saqqummiussilluni.

Meeqqat atuarfianni atuartumut ataatsimut aningaasartuutaasartut - kommunimiit kommunimut assigiinngitsupilussuupput. 2019-imi nuna agguaqatigiissillugu 96.985 koruuninik aningaasartuuteqartoqarsimavoq, Avannaata Kommuniani atuartuuteqarneq akisunerpaalluni 107.377 koruuninik aningaasartuuteqarfiusarsimasoq Kommneqarfik Sermersuumi 83.481 koruunit aningaasartuutigineqarsimapput.

Nikingassutsit annertuut

Illoqarfiit pingaarnersaata kommuniani aningaasartuutaasartut 2010-mili allannguuteqarpallaarsimanngillat. Tassa 2010-miit 2019-imut meeqqat atuarfianni atuartumut ataatsamut aningaasartuutigineqarsimasut taamaallaat 9,24 procentimik qaffassimagamik, kommuninili allani aningaasartuutigineqarsimasut 32 procentit sinnerlugit qaffassimallutik.

2019-imi atuartumut ataatsimut aningaasartuutigineqarsimasut (2010-miili procenti qaffariaataasimasoq)

Kujalleq: 102.788 kr. (34,96 %)

Sermersooq: 83.481 kr. (9,24 %)

Qeqqata: 93.481 kr. (32,47 %)

Qeqertalik: 97.795 kr. (38,68 %)

Avannaata: 107.377 kr. (52,27 %)

Nuna tamakkerlugu: 96.984 kr. (32,1 %)

TAKUUK: Kommuni Qeqertalimmi aamma Avannaata Kommuniani procentit naatsorsorneqarneranni 2009-mi Qaasuitsup Kommunianeersut tunngavigineqarput .

Nivi Olsenip aamma apeqqutigisimavaa atuarfinni tamani, tassa illoqarfinni nunaqarfinniluunniit klassimi ataatsimi atuartut agguaqatigiissillugit qanoq amerlatiginersut, Ane Lone Baggerillu akissutaami kisitsisit uku takuneqarsinnaapput:

Klassimi ataatsimi atuartut agguaqatigiissillugit (specialklassit minillugit) illoqarfik - nunaqarfik:

Avannaata: 14,79 – 6,20

Qeqertalik: 13,17 – 5,25

Qeqqata: 16,15 – 7,95

Sermersooq: 18,96 – 9,00

Kujalleq: 17,37 – 5,70

Nuna tamakkerlugu: 16,65 – 6,66

Atuarfimmiit atuarfimmut annertuumik assigiinngissuteqartoqartoq takuneqarsinnaavoq. Soorlu atuarfimmi ataatsimi – Atuarfik Hans Lynge – klassimi agguaqatigiissillugit atuartut 23-upput. Nuup illoqarfiata qeqqani atuarfinnut marlunnut sanillersuukkaanni – klassimi agguaqatigiissillugit atuartigineqarput 17,84-it aamma 19,52-it.

Nunat avannarliit

Nivi Olsenip aamma meeqqat atuarfianni atuartumut ataatsimut aningaasartuutigineqartartut pineqartillugit, nunani avannarlerni allani aningaasartuutigineqartartunut sanilliussisoqarnissaa piumasarisimavaa. Naatsorsueriaatsilli assigiinngitsuuneri pissutigalugit, Ilinniartitaanermut Naalakkersuisoqarfik kisitsisinik toqqaannartumik sanilliunneqarsinnaasunik pissarsisinnaasimanngilaq, akissuteqaammi allassimavoq.

Ane Lone Baggerip akissutaa tamakkerlugu takuuk aamma kommunini, illoqarfinni nunaqarfinnilu kisitsisit naatsorsorneqarsimaneri takukkit

Powered by Labrador CMS