Meeqqat atornerlunneqarsimasut inuunerup sinneranut sunnerneqartarput

Inersimasoq meeqqamik pinngitsaaliilluni atornerluigaangat, taava taanna meeraq pitsaannginnerusumik inuuneqartarpoq. Nalunaarusiap 'Kalaallit Nunaanni inuusuttut - kinguaassiuutit atornerat aamma kinguaassiuutitigut atornerluinerit sammillugit', Namminersorlutik Oqartussat 2015-imi suliarititaata tamanna naqissuserpaa.

Piviusut nikallunganartut ukioq manna nuna tamakkerlugu katersuiniarnerup meeqqanut atornerluisarnerit pinngitsoortinniarlugit sammitinneqarnerata erseqqissarpaa.

Atornerlueqqinnissamut navianartoqartoq
Meeraq imaluunniit inuusuttoq pinngitsaalineqaqqinnissaminut navianartorsiornerujussuusartoq nalunaarusiap naqissuserpaa. Ingammik niviarsiaqqat pinngitsaalisaallutik atornerlunneqaqqinnissaminnut navianartorsiornerusarput.

Tamatuma saniatigut inuusuttut pinngitsaalisaallutik atornerlunneqarsimasut appasinnerusumik naleqassutimik misigisarput, inuunertilugu naammagisimaannginnerullugu ikinngutikinnerusarput.

Ilinniarnerat eqqorneqartoq
Tamatuma aamma atuarnerat sunnertarpaa, taamaalillunilu inuunermi ingerlariaqqinnissamut periarfissaat sunnerneqartarlutik.

Inuusuttut atornerlugaasimasut meeqqat atuarfiata kingorna unittoortarput. Peqatiminnut sanilliullutik 10. klassi qaangerlugu ilinniagaqannginnerusarput. Tassanilu niviarsiaqqat eqqugaanerpaasarput.

Tamanna aalakoorajunnerunerannut, taamalillutillu ilinniagaqarnissamut periarfissatik suli sunnernerusarnerannut ataqatigiisinneqassaaq.

Kinguaassiuutitigut atornerlunneqarsimaneq imigassamik annertuumik atuinermut pissutaanersoq misissuinerup naqissusersinnaanngilaa.

Imaluunniit killormoortuanik imigassamik atuineq atornerlugaanissamut navianartorsiorneq annertunerulertarnersoq.

Taamaattoq inuusuttut imigassamik annertuumik atuisuugaangata kinguaassiuutitigut atornerlunneqarnissamut navianartorsiorneq maluginiarneqarnissaa nalunaarusiap innersuussutigaa.

- Inuusuttunik siusissukkut imigassamik annertuumik atuisunik sullitaqaraanni, taava aamma pissutsit kinguaassiuutitigut atornerluinerit ajornartorsiummut ilaasutut ilanngunneqartarnissaat tulluartuussaaq, nalunaarusiami allaqqavoq.

- Aammattaaq tunuliaqutaasumik pissuteqarsinnaanera isumaliuutiginissaa naleqquppoq, tassa meeqqap/inuusuttup killissaq suna eqqortuunersoq nalileruminaatsinneraa.

Meeqqat arfineq-marluk ataallugit ukiullit atornerlunneqartarnerat
Kinguaassiuutitigut atornerluinerit qanoq amerlatigisut pisarnersut nalunaarusiap erseqqissumik takussutissiissutiginngilaa. Tassami immikkoortut pingaasut naapertorlugit suliaqarput.

Inuusuttoq qanga siullermeerluni kinguaassiuutit atorlugit peqateqarsimanersoq, kina siulliulluni periartuunersoq kiisalu siullermeereernerup kingorna kinguaassiuutitigut nammineq piumassuserinngisaminnik peqateqarsimanersut aperineqartarput.

Taakku 6-7 procentii arfineq-marlunnik ukioqarlutik imaluunniit ukiukinnerullutik siullermeerlutik kinguaassiuutit atorlugit peqateqarsimanerat inerniliunneqartut ilagaat.

Taakkulu 41 procentersui suli ukiukillutik 15-it ataallugit ukioqarlutik kinguaassiuutit atorlugit peqateqarsimapput. Taakkunani amerlasuutigut ukioqatiminnik peqateqartarsimapput.

Arnat 22 procentii angutillu 5 procentii ukiukillutik kinguaassiuutitigut peqateqaramik nammineq aalajangeeqataasimanatik oqaatigaat.

Pinngitsaaliillunili atornerluinerit amerlanerusut nalunaarusiami maluginiaqquneqarpoq, inersimasoq ukiukitsumik ilaqarsimatillugu tunngaviusumik pinngitsaaliinermik nalilerneqartariaqarmat.

- Meeraq qanorluunniit kinguaassiuutitigut qaninniaraluarpat, inersimasup (imaluunniit angajulliup) kinguaassiuutitigut peqateqartoqannginnissaa akisussaaffigaa, nalunaarusiamik allaaserinnittut allapput.

Nuna tamakkerlugu katersuiniarneq KNR TV-ikkut aqagu toqqaannartumik 20.00-mit 23.00-ip tungaanut aallakaatinneqassaaq.