Happy Christmas Challenge
Meeqqat Angerlarsimaffiini najugalinnut juullimi nuannaartitsiserusuttut
Meeqqanut Meeqqat Angerlarsimaffiini najugaqartunut juullimi nuannartitserusullutik inuit marluk Nuummersuut Facebookimi unammissut ‘Happy Christmas Challenge’ aallartissimavaat
Nunaqqativut Facebookimik atuisut arlallit upernaaq imminnut unammilleqattaarlutik imaanut pisseqattaarput.
Maanna Facaebookimi unammillerneq alla atuutilerpoq - nuannersoq.
- Meeqqat juulli nuannaarfigisarpaat. Taama oqaluttuunneqartuaannarnikuuvunga. Taamaammat una unammillerneq aallartippara.
Taama Nuummersoq Kulunnguaq M-Motzfeldt, illooqqani Marie Kathrine Heilmann peqatigalugu Facebookimi unammissummik ’Happy Christmas Challenge’-imik aallartitsisoq oqaluttuarpoq.
‘Happy Christmas Challenge’-imi Facebookimik atuisup ikinngutini pingasut juullimut tunissummik poortukkamik meeqqamut ataatsimut arlalinnulluunniit pisinissaanik unammillertarpai. Unammillerneqartup nammineq Meeqqat Angerlarsimaffiat sorleq tunissuteqarfigissanerlugu toqqartussaavaa.
- Isumassarsiaq pissarsiarivara amerikkarmiut meeravissianngortissimasut pillugit aallakaatitassiap isiginnaarnerani. Tassani oqaluttuarineqarpoq meeravissianngortinneqartut angerlarsimaffinni nalinginnaasuni toqqissisimanerulertartut. Tassanilu eqqarsaatigilerpara meeqqat Meeqqat Angerlarsimaffiiniittut qanoq juullimi nuannaajallatsissinnaanerlugit, Kulunnguaq M-Motzfeldt oqaluttuarpoq.
Maliina Abelsen unammillerpaat
Tamatuma kingorna Kulunnguaq M-Motzfeldtip illoqqaani peqatigalugu eqqarsaatersuutigivaat tunissutissanik tunioraaneq siuarterneqapallassinnaasoq qanoq aaqqissuussinnaanerlugu.
- Taava tassa ‘Happy Christmas Challenge’ aallartipparput, uanga inunnik pingasunik qularnanngitsumik pinngitsooratik tunissuteqarsinnaasunik toqqaavunga, oqaluttuarpoq.
- Kingornalu aamma Danmarkimit attavigineqarpugut, taanna aamma meeqqat ilaannut tunissuteqarusuppoq. Taannalu isumaqatigiissuteqarfigivarput aningaasanik uatsinnut nassiussisinnaasoq, uagut tunissutissaq pisiareriarlugu ingerlateqqissagatsigu.
Kulunnguaq M-Motzfeldtip Maliina Abelsen, Ruth Ann Montgomery-Andersen aamma anaanani siullerpaatut poortukkamik pisiniartussatut Facebookimi unammillerpai.