Meeqqat angerlarsimaffiat misissorneqartoq: Naammanngilaq

Meeqqat atugarliortut ullumikkut pisortanit ikiorserneqarnerminnit, ikiorneqarnissaminnik suli pisariaqartitsipput.

Det Nationale Forskningscenter for Velfærd,SFI-mit, misissuinermit nalunaarusiami inernerit ilaat taama nipeqarpoq.

Meeqqat piffissap ilaani Meeqqat Inuusuttullu Illuanni Mælkebøttemi Nuummiittumi najugaqarsimasut, tamatumalu kingorna allanut inissinneqarsimasut, SFI-p malinnaavigisimavai.

Misissuinerup takutippaa, naak meeqqat Mælkebøttemi najugaqarnertik iluaqutigisimagaluarlugu, Mælkebøttemi najugaqareernermik kingorna ukiut pingasut-tallimat qaanngiunnernerini suli unammilligassarpassuaqartut.

Attaveqarneq ajornakusoortikkaat
Meeqqat Mælkebøttemi najugaqarsimanertik nuannersutut eqqaamavaat. Piffissami tamatumani sungiusimasaminniit eqqissisimanerunermik inersimasunillu najorneqarnerunermik misigisaqarsimapput.

Taamaakkaluartorlu ukiumikkut ilutigisaminnut allanut naleqqiullutik suli nukissakinnerupput ajornartorsiuteqarnerullutillu. Arlallit atornerluisuupput inooqataanikkullu attaveqarnerminni pisunik iliuuseqarfiginninnissaq ajornakusoortinnerullugu.

Sivisuumik ikiorneqarnissamik atorfissaqartitsineq
Naak meeqqat Mælkebøttemi najugaqarnertik pitsaasunik pissarsiffigisimagaluarlugu, suli ajornartorsiortorujussuupput. Iluaqutaassappat annertunerusumik suliniartoqartariaqartoq, ilisimatooq Else Christensen, misissuinermik suliaqartoq naliliivoq.

- Meeqqat taakku nutaamik aallartinnissaannut ikiussagaanni siunissamut ungasinnerusumut isigaluni suliniuteqartoqariaqarpoq. Suliniutinut ilaasinnaavoq, inuusuttoq ilinniagaqalernissaanut, suliffeqalernissaanut atornerluisuunanilu inuunissaanut tapersersorniarlugu ilitsersuisoqartitsinermik (mentorordning) aaqqissuussineq.

Siornatigut inuunerisimasaq ukkatarineqarnerusariaqarpoq
Meeqqat Mælkebøttemut inissinneqartartut amerlanersaat, inissinneqannginner-minni arlalinnik ikilerneqarsimasarput, tamakkulu Mælkebøttemiinnerisa nalaanni tamatigut suliarineqartanngillat. Tamanna ukkatarineqarnerusariaqarpoq, Else Christensen isumaqarpoq.

- Meeqqat ingerlaqqissagunik misigisimasamik suliarinissaannut periarfissaqartariaqarput.

Meeraaneq misiginerusariaqarpoq
Meeqqat Mælkebøttemiissimanertik tamangajammik nuannersutut eqqaamavaat, tamannalu nalorninatik oqaatigisarlugu. Najugaqarnerminni pissutsit eqqissisimanartutut, meeraqatiminnut akuullutik inuusimasutut minnerunngitsumillu inersimasunit eqqumaffigineqarlutik inuusimanertik eqqaamavaat.

Aamma meeqqat Mælkebøttemut nuunnginnerminni inersimasutut akisussaaffeqarsimanerminniit akisussaaffimmik tigumminninnginnerusimapput.

Atuaruk: Perorsaasut ilinniartitsisullu meeqqat illersuisuat taperserpaat

- Mælkebøttemiissimanngitsuugunik pissarsiassarisimanngisaminnik pissarsisimapput. Immaqa oqartoqarsinnaavoq Mælkebøttemiinnerminni meeqqatut misigisassatik misiginerusimagaat, tassaniissimanngitsuugunik misigisassarinngisaraluatik, ilisimatooq Else Christensen naliliivoq.

Mælkebøtten pillugu ilisimatuunik nalunaarusiaq aamma nammineq atuarneqarsinnaavoq.

SFI.dk-mi atuaruk: Tre år efter ophold på Mælkebøtten