Uummannami meeqqat angerlarsimaffianni sulisut meeqqanik tapersersuilluarput angajoqqaanullu attaveqartitsinerat pitsaavoq. Namminersorlutik Oqartussat nakkutilliiartortitai meeqqat angerlarsimaffiannut septemberimi nakkutilliiartorsimasut taama naliliipput.

Meeqqalli angajoqqaaminnut attaveqarnissaat ilaanni ilungersunarsinnaasartoq, nakkutilliiartortitat nalunaarutaanni allassimavoq.

Meeqqat angerlarsimaffiat angajoqqaajusut Danmarkimi najugaqarpata, meeqqat tikeraartinneqarnissaannut meeqqat angerlarsimaffiat nammineerluni akiliisariaqartarpoq.

Akiliuumasanngitsut

- Angajoqqaajusut Danmarkimi najugaqarsimappata tikeraarluni angalanissat akilernissaat sullissisunit itigartitsissutigineqeartarnera paaqqinniffimmit misigineqartarpoq. Paaqqinniffiup angalanissat taakku nammineq akilernissaat aalajangertarpaa najugaqartut angajoqqaaminnut attaveqarnerat ikorfartorumallugu, nakkutilliinermit nalunaarummi allassimavoq.

Nakkutilliiartortitat nalunaarusiaanni allassimavoq suleriaaseq tamanna pillugu Meeqqanut, Inuusuttunut Ilaqutariinnullu Naalakkersuisoqarfimmut Nakkutilliinermik Ingerlatsiviup ilisimatitsissutigigaa. Inatsit naapertorlugu meeqqat ilaquttaminnut tikeraarsinnaasussaapput akiliunneqarlutik, tikeraarfissarlu tassaassalluni angajoqqaat akisussaasuusut najugarisaat. Inatsimmi allassimasoqanngilaq angajoqqaat Kalaallit Nunaanni najugaqartut kisimik pineqassasut.

Nalunaarusiami aamma nassuiarneqarpoq ilaqutaasut ilagineqartarneri iliuusissatut pilersaarummut ilaanni naleqquttanngitsut, iliuusissatut pilersaarut amigaatigineqartarmat imaluunniit nutaanngilivallaarsimasarmat.

Nalunaarutiginninnerit marluk

Nakkutilliinermik ingerlatsiviup meeqqat angerlarsimaffiani sulisut pitsaasutut piginnaasatigullu ajunngitsumik inissisimasutut nalilerpai. Meeqqat angerlarsimaffiat Uummannamiittoq ingerlalluarpoq, meeqqallu 27-t missaanniittut pitsaasumik peroriartornissaat qitiutinneqarpoq.

Ingerlatsiviulli nakkutilliinermini maluginiarpaa meeqqat marluk meeqqat angerlarsimaffianni najugaqarnissamut pisariaqartitamikkut tulluutinngitsut.

Najugaqartup aappaa najugaqartuunermini allanik pisariaqartitsilersimavoq, meeqqanullu angerlarsimaffiup najugaqartup allamut inissinneqarnissaa sulissutigisarsimagaluarpaa.

Innersuussutaannaat - peqqussuteqanngilaq

Najugaqartoq alla pisariaqartitaminik nalilersorneqareerluni paasineqarpoq neqeroorummi allami inissinneqarnissaa pisariaqarnerusoq. Aningaasaqarnikkut sulisutigullu atuinarnerugaluartoq, taamaattoq meeqqat angerlarsimaffiata najugaqartoq immikkut suliniuteqarfigaat, meeqqat angerlarsimaffiani najugaqarsinnaanngimmat.

- Nakkutilliinermik ingerlatsivik najugaqartut marluk pillugit nalunaaruteqarpoq, allamullu inissinneqarnissaannik innersuussilluni, allassimavoq.

Nakkutilliinermik ingerlatsivik arlalinnik innersuussuteqarpoq, peqqussutinilli tunniussaqarani.