Meeqqat amerlanerujussuit upalungaarsimasunukartinneqartalersut
Illoqarfiit pingaarnersaanni meeqqat atuarfinni meeqqerivinnilu upalungaarsimanermik atuisut, sisamanngornermi martsip 19-ianili matusisoqarmat amerleriangaatsiarsimapput.
Nuummi atuarfiit matuneqarmata ulloq siulleq atuartut qulit atuarfiartorsimapput. Kisitsisit taakku maanna qaffangaatsiarsimapput, ippassarlu atuartut 37-t aturiartorsimallutik.
Meeqqerinnukartartut aamma amerlisimapput.
Meeqqeriviit sisamanngornermi martsip 19-ani meeqqanik 64-inik paarsisimapput, ullunilu kingunngillerni marlunni – marlunngorneq pingasunngornerlu - meeqqat 150-it 149-llu upalungaarsimasunit paaqqutarineqarsimallutik, Kommuneqarfik Sermersuup naatsorsuisimaneranit kisitsisit takutitsipput.
Kikkut upalungaarsimasunik atuisinnaappat?
Aningaasaqarnermut Naalakkersuisoqarfik allakkiorsimavoq, meeqqat paarineqarsinnaanerannut pisinnaatitaaffeqarnissamut, suliassat suut inuiagatigiinnut pingaaruteqarluinnartutut isigineqartunik nassuiaasuiaasumik.
Naalakkersuisoqarfimmit tunngaviit arfineq marluk allattorneqarsimapput, aammalli erseqqissaassutigineqarluni najoqqutassiaannaasut.
”Nunatta aningaasatigut unittuunnginnissaa” sapinngisamik attatiinnarneqassaaq. Imaappoq, pingaartumik suliffeqarfiit namminersortunit pigineqartut nalinginnaasumik ingerlatsinertik sapinngisamik attatiinnassavaat.
Pisortat suliffeqarfii pingaarutillit ukununngali (killiligaanngitsumik) peqqinnissaqarfik, pilersuineq akissarsianik tunniussineq, attatiinnarneqassapput.
Suliniutit naapertuuttuunissaat anguniarneqassaaq, taamaalilluta Coronamik nalaataqarneq anigorutsigu inuiaqatigiittut sapinngisamik piaartumik aallarteqqinnissarput qulakkeerniassagatsigu.
Qanorluunniit meeqqeriviit atuarfiit allallu matuneqaraluarpata, kommunit meeqqat angajoqqaavi inuiaqatigiinni pingaarutilinni atorfeqartut ajornartoornermi paarsititsinissaannik neqerooruteqarput.
Tamanna sulisoq inuiaqatigiinni pingaarutilimmik atorfeqarnersoq pillugu aqutsisumut tamakkiisumik aalajangiiffigisassanngortinneqarpoq. Taamaattumik sulisut ataasiakkat tamanna namminneq aalajangissanngilaat.
Sulisut, inuiaqatigiinni pingaarutilinni atorfeqartutut (paasitinneqarsimasut), namminneq meeqqaminnik paarsinissartik pillugu suliffimminni najuutinngippata, suliffimmiit peqquteqarani sulinngitsoornertut isigineqassaaq, aningaasarsiaqaatigineqassananilu.
Aappariinni, aappaasoq inuiaqatigiinni pingaarutilimmi atorfeqarpat, aappaalu pisortat suliffeqarfiutaannit angerlartitaasimasoq imaluunniit angerlarsimaffimmi suleqquneqarpat, taava aappaasup, suliffimminit angerlartitaasimasup meeqqat paarisariaqarpai.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...