Maniitsoq

Meeqqat allaat 11-iinnarnik ukiullit hashitortarput

Maniitsumi hashimik atornerluineq ajornartorsiutaasorujussuuvoq, tamanna erserpoq innuttaasunik ataatsimiititsinermi

Qeqqata Kommuniata hashimik atornerluineq Maniitsumi oqaluuseritippaa

Meeqqat inuusuttuaqqallu 11-t 15-illu akornanni ukiullit hashimik pujortaqatigiittarput. Aningaasanik pissarseriarlutik ikiaroornartunik inerteqqutaasunik piseriarlutik qaqqamut pujortariartarput, allamut pujortariarfissaqannginnamik.

Oqaluttuarineqartut ilaat

Hashimik atornerluinermik oqaluttuarineqartut ilaat taamatut nipaqarpoq, Qeqqata Kommuniata Ilaqutariinnut Isumaginniffia qaammammi kingullermi Maniitsumi innuttaasunik ataatsimiititsimmat, quleqatalimmik ´Hashimut qujaannarpunga´, taamatut kommuni paasissutissiivoq.

Naartusunut allaat

Ataatsimiinnermi aamma oqaatigineqarpoq peqqinnissaqarfimmik atuisuni hashimik atornerluineq aamma takussaasorujussuusoq.

Taamaasilluni Maniitsup Peqqissaaviata piffissami 2012-miit 2015-imut arnat naartusut katillugit 39-it aapparisaallu, hashimik atornerluinermut katsorsartinnissaannut innersuuttarsimavai.

Kinguneqaatit

Innuttaasunik ataatsimiititsinermi siunertaasimavoq hashimik atornerluinerup tamatumalu ilaqutariit inuunerannut peqqinnermullu sunniutaasa oqaluuserineqarnissaat.

Ajoqutaavoq

Kommunimit nalunaajaat pingaarutilik tassaavoq atornerluineq meeqqanut inuusuttunullu ajoqutaasoq, assersuutigalugulu kommunimi immikkoortoqarfiit assigiinngitsut pisussaaffeqartut hashimik atornerluinermik pasinartoqarpat tamanna nalunaarutigissallugu.

Powered by Labrador CMS