Meeqqat
Meeqqat affaat tusaaniarnermikkut ajornartorsiuteqarput
Nakorsat iliuuseqaqqusipput: Meeqqat siutimikkut aseruuttooraangamik tusilarlersinnaasarput
Meeqqat siullunnerminnik tusaasaaruttartut amerlavallaarujussuarput.
Nuummiuaqqat Iluliarmiuaqqallu affaat sinnerlugit nakorsat siutinut qingamut toqqusaanullu immikkut ilisimasallit misissuineranni peqataasut siullissimanertik pissutaallutik tusaasaarussimapput.
Kisitsisit ataavarput
Nunatsinni meeqqat 6 procentii siutiminnik aseruurnerminnit tusaasaarutivissinnaanermik navianaateqartut misissuinerup takutippaa.
Immikkut ilisimasallit Rigshospitalimeersut Sjællandillu Universitethospitalianeersut misissuinermik ingerlatsipput.
- Kalaallit Nunaanni inuuniutit nalingat pitsanngoriaateqarsimagaluartoq sivisuumik siulluttartut amerlassusaat 1996-miilli nikissimanngillat. Nuummi meeqqat 6,8 procentii siulluttartut misissuinerup paasitippaa. Sivisuumik siullunnerip tusaasat 30-35 dB-mik annikillisissinnaammagit tamassuma eqqumaffigineqarnera annertusineqartariaqarpoq, nakorsat misissuinerminni inerniliipput.
Tusaasarinneq ineriartornermut pingaaruteqarpoq
"Inuiaqatigiinnut akuusinnaanermut silassorisssusillu ajunngitsumik ineriartorsinnaanissaanut oqaatsinillu allanik ilinniarsinnaanissamut tusaasat ajoquteqannginnissai pisariaqartoq" nakorsanit tikkuarneqarpoq. Meeqqallu amerlanerit misissorneqassasut siutimikkullu aseruuttoorpata nakorsaatitortinneqarnissaat kaammattuutigaat.
Meeqqalli arlaqartut tusillassereersimammata pinaveersaartitsineq kisimi naammanngitsoq nakorsat isumaqarput. Meeqqammi tusaaniarnerminni ajornartorsiuteqalersimasut atuarneranni ikiortariaqartut tikkuartorpaat.
Atuaruk: Røde Kors: Kikkut ernumanaateqartumik inissisimanerpaappat?
- Canadami avannaaani inuit najugaqarfiini meeqqat klassianni nipinik nipittorsaatinik ikiorserneqarneri ilinniarnerannut iluaqutaangaatsiarsimapput, tamannalu Kalaallit Nunaanni aamma aallartinneqarsinnaalluni. Siutip sulairineqarnerani igalaasaq putuerussinnaasarnera meeqqani angajullerni inersimasunilu Kalaallit Nunaanni iluatsilluartarnera nakorsiartarfimmi imminut akilerluarsinnavoq. Taamatullu suliaritittarneq Kalaallit Nunaanni ingerlaannarnissaa pingaaruteqarpoq, misissuinermi suliaqartut nakorsat kaammattuipput.