Meeqqanut tapiissutit meeqqanut tamanut tunniunneqartalernerat imatut akeqassaaq

Naalakkersuisut inatsisissatut siunnersuut, meeqqanut tapiissutinik ilaqutariinnut isertitakittunut tunniunneqartartunik qaffaasussaq maannakkorpiaq tusarniaassutigaat.

Naleqqami politikkeri Emanuel Nûko isumaqarpoq, meeqqat tamarmik meeqqat tapiissutaannik tunineqartalernissaat kissaatiginarsinnaasoq. Tamannali nunatta karsianut akisuupilussuussaaq, taamaammallu susassaqarfinnut allanut aningaasaliissutinit ilanngaalluni aningaasanik pissarsisoqartariaqarluni, Naalakkersuisut Naleqqami politikkerimut akissutaanni allassimavoq.

Naalakkersuisut naapertorlugit, meeqqat ikinnerpaamik 6.301-t 2021-mi meeqqanut tapiissutinik pissarsisussaatitaasimapput, taamaalillunilu meeqqat 7.467-it missaanniittut meeqqanut tapiissutinik pissarsisaratik. Meeqqanut tapiissutit annertussusaat angajoqqaajusut ullumikkut isertitaat tunngavigalugit naleqqussarneqartarput. Isertitaqarnerujartortillugit tapiissutit annikilliartortinneqartarput, tapiissutillu 1.200 koruunit inuleraangatikkit tapiissutinik pissarsisoqartarunnaartarluni.

2022-mut aningaasanut inatsit malillugu meeqqanut tapiissutinut 45 millioner koruunit missaanniittut immikkoortinneqarput, meeqqallu tamarmik tapiissutisisassappata taakku naammanngilluinnartut, isumaginninnermut sulisoqarnermullu naalakkersuisoq Jess Svane (S) allappoq:

80 millioner koruuninik akiligassaqarnerusoqalissasoq

- Meeqqat tamarmik 18-it inorlugit ukiullit angajoqqaat isertitaat apeqqutaatinnagit meeqqanut tapiissutinik pissarsisalissappata, maannakkut tunniunneqartartut isigalugit meeqqamut ataatsimut ukiumut annerpaamik 9.093 koruuninik, tassa ukiumut 125 millioner koruunit missaannik pisortat aningaasartuuteqarnerannik kinguneqartussaassaaq, imaluunniit pisortat aningaasartuutaat maannakkumut naleqqiullugit ukiumut 80 millioner koruunit missaannik qaffassasut.

Emanuel Nûkop aamma meeqqanut tapiissutit meeqqanut tamanut tunniunneqartalissappata kinguneqaataasinnaasut apeqqutigisimavai, tassungalu atatillugu Jess Svanep erseqqissaassutigaa, anigaasat pisortat missingersuutaanni allani nassaarineqartariaqassasut:

- llaqutariinnut aaqqiissuteqarnissamut killissarititaq sinnerlugu isertitaqartunut, taamaattumillu maannakkut malittarisassat malillugit meeqqanut tapiissutinik tunineqartanngitsunut, isumaqarpoq ukiumut meeqqanut tapiissutinik 9.093 koruuninik tunineqartalissasut.

Qaffaanissamik pilersaaruteqartut

- Aningaasaliissuteqarsinnaaneq innuttaasunut toqqaannanngitsumik kinguneqartussaavoq, tassami aningaasartuutit amerlinerannut aningaasat pisortat missingersuutaanni allatigut nassaarineqassammata, taamaasillunilu suliassaqarfiit allat aningaasanik annaasaqarlutik, Jess Svanep akissutaani allassimavoq.

Inatsisissatut siunnersuut Naalakkersuisut tusarniaassutigisaat naapertorlugu, meeqqat tapiissutaannut aningaasartuutigineqartartut 2023-mi 7,9 millioner koruuninik qaffanneqarnissaat Naalakkersuisunit pilersaarutigineqarpoq.

Pilersaarutaavoq, aningaasat meeqqanut tapiissutit ilaqutariinnut isertitakinnerpaanut tunniunneqartartut qaffanneqarnissaannut atorneqassasut.