Meeqqanut navianartumiittunut suliniut: Killiffilersuisumik nalunaarusiaq amigartoq

Danskit kalaallillu isumaginninnikkut suliassaqarfimmi suleqatigiinnerat misissuiffigineqassaaq, kisianni paasissutissat nalunaarsuinerillu amigaataammata ajornakusoorpoq.

Naalakkersuisut danskillu naalakkersuisui 2019-imi oktobarimi isumaginninnikkut suliassaqarfimmi suleqatigiinnissaq isumaqatigiissutigaat.

Nunatsinni suleqatigiilluni isumaginninnikkut sulineq killiffilersuilluni nalunaarusiami misissuiffigineqarpoq, nalunaarusiarlu Folketingimi Kalaallit Nunaat pillugu ataatsimiititaliamut nassiunneqaqqammerpoq.

Nalunaarusiarli kommunini isumaginninnikkut sullissinermit paasissutissanik nalunaarsuinernillu amigaateqarnermik annertuumik unamminartoqartitsivoq.

Nalunaarusiami kisitsisit pingaarutillit assigiinngitsut misissorneqartussaagaluarput, ilaatigut kommunimi sullissinermit, 2023-illu tungaanut nalunaarusiat arlallit suliarineqartussaapput, tassanilu kisitsisit aalajangersimasut nakkutigineqassallutik.

Killiffilersuilluni nalunaarusiap makku misissussavai

Ataavartumik aalajangersimasumillu suliniutiginiarneqartut aallartinneqarnerinut piumasaqaatit pingasut kiisalu meeqqat inuusuttullu navianartumiittut nalerisimaarnerannit takussutissat pingasut malinnaaffigineqassapput:

Suliniutinut siunnersuutigineqartunut atuutilersitsinermut piumasaqaatit:

  • Nalunaaruteqartarnerit ineriartornerat
  • Kommunini ingerlatsivinni meeqqanut inuusuttunullu navianartumiittunut suliat suliarineqanngitsut
  • Meeqqanut inuusuttunullu kinguaassiuutitigut kannguttaatsuliorfigineqarsimasunut katsorsaanermut periarfissat
  • Meeqqat inuusuttullu navianartumiittut akornanni nalerisimaarnermut takussutissat
  • Nakuusernermut, angerlarsimaffimmi eqqissiviilliornermut aamma meeqqamut kinguaassiuutitigut kannguttaatsuliornermut/innarliinermut nalunaarutit
  • Angerlarsimaffiup avataani inissiisarnerit amerlassusaasa ineriartornerat
  • Meeqqat inuusuttullu akornanni imminut toquttarnerit amerlassusaat

Misissuinermit inernerit ukiumut marloriarlutik piffissami 2021-mit 2023-mut saqqummiunneqartassapput.

Najoqqutaq: Anguniakkat malitseqartinneqarnerinut atuutilersinneqarnerinullu killiffik

Nalilersuinermi immikkoortoq siulleq meeqqat nalunaarutigineqartartut amerlassusaannut tunngavoq, tassanilu assersuutigalugu nunatsinni kommuninit tallimaasunit marlunneersut ilaannakortumik kisinneqarsinnaapput.

Tassani Kommuneqarfik Sermersooq aamma Kommune Kujalleq pineqarput. Tassani Kommune Kujallermi 2020-mi 376-inik nalunaaruteqartoqarsimasoq, kisitsinerup takutippaa. Nalunaarutiginninnerit meeqqanut 227-nut 0-17 akornanni ukiulinnut tunngapput. Tassa imaappoq, meeqqat ilaat arlaleriarlutik nalunaarutigineqartarput.

Kommuninit pingasunit paasissutissat amigaatigineqartut
Kommunimi meeqqat amerlassusaannut sanilliullugit, meeqqat 15 procentii nalunaarutigineqarput.

Kommuneqarfik Sermersuumi katillugu 2.068-inik 2020-mi nalunaarutiginnittoqarpoq. Nalunaarusiaq naapertorlugu meeqqat qanoq amerlatigisut nalunaarutigineqartut pineqarnersut kisinneqarsinnaanngillat, nalunaarsorneqarsimanngimmata.

Kisitsisilli 2019-imi kisinneqarput, tassani meeqqat 1.087-it 2.656-eriarlutik nalunaarutigineqarput. Tamanna kommunimi meeqqat tamarmiusut 2019-imi 19 procentii nalunaarutigineqarput.

Nalunaarusiaq naapertorlugu kommunit sinnerinit paasissutissanik pissarsisoqarsinnaasimanngilaq.

Paasissutissat tunngaviusut pitsanngornissaat sulissutigineqarpoq
Nalunaarusiami aamma kommunini meeqqat pillugit isumaginninnikkut suliat suliarineqarsimanngitsut amerlassusaat misissorneqartussaagaluarpoq, kisianni nalunaarsuinerit amigaataammata taamaaliortoqarsinnaasimanngilaq.

- Kommunini paasissutissanik katersinermi unammillernartoqarnera pissutigalugu kisitsisinut tunngatillugu nalorninartoqartorujussuuvoq, ingammik nalunaarutinut aamma sulianut suliarineqanngitsunut kommunimit tiguneqartunut tunngasut, aammalu kommuninit tallimanit tamanit paasissutissaqanngimmat.

- Paasissutissat tunngaviusut pitsanngorsarnissaat piffissami suliniuteqarfiusumi sulissutigineqarpoq, piffissaq qaninnerusoq eqqarsaatigalugu pitsaanerusumik paasissutissanik katersisoqarneratigut aamma piffissaq akunnattoq eqqarsaatigalugu ESDH-systemimik kommuninut tamanut atuutilersitsinikkut, killiffilersuilluni nalunaarusiami tamanna allaqqavoq.

Powered by Labrador CMS