Meeqqanut nakorsat isornartorsiuinerat naalakkersuisuusimasup aamma ilisimasaqarfigisimavaa
Peqqissutsimut Naalakkersuisoqarfiup meeqqat nakorsaat peqqinnissaqarfik pillugu isornartorsiuteqarlutik allagaat oktober 2020-mili ilisimasaqarfigilerpaat. Allagaqartulli pingasut politikkikkut suli akineqanngillaq. Tamanna ajornartorsiutaavoq, naalakkersuisuusimasoq, allakkamik ilisimasaqareersoq, taama isumaqarpoq.
Meeqqat peqqissusaat napparsimatillutillu katsorsarneqarnissaannut neqeroorutit maanna oqallisaangaatsiarput. Piffissamimi kingullermi anaanat arlallit meeqqatik ilagalugit Danmarkimut angalanermik namminneq akiliillutik nakorsiussisaqattaarput.
Peqqissutsimut Naalakkersuisoq, Kiista L. Fencker ilisimatitsivoq meeqqat peqqissusaat peqqinnissaannullu neqeroorutit pillugit MIO-mik ataatsimeeqateqarnissaq siunniullugu, meeqqallu nakorsarisimasaata pingasut ernumaateqarlutik allagaat naalakkersuisoqarfiup nalilersoqqissangaa. Nakorsat kissaatigaat meeqqanut katsorsaasarnerup pitsaanerulernissaanut siunnersuutitik pillugit Naalakkersuisunik oqaloqateqarnissaq.
Meeqqat pisinnaatitaaffii pillugit suliaqartunik ataatsimeeqateqarnissaq naammanngilaq, akisussaaffimmi Naalakkersuisuusimasoq Demokraatinilu peqqissutsimut oqaaseqartartoq Anna Wangenheim isumaqarpoq.
- Aaqqiiniarneq allaanerulaartoq ataqqineqarsinnaavoq, takusinnaavarpulli angajoqqaat arlallit ilungersorluinnalersut, taamaakkaluartorli aaqqiissutaagallartussanik nalilersuinissanillu politikkikkut suliaqartoqarniartoq, piviusut qiviarnagit, tusagassiorfinnut nalunaaruteqarluni allappoq.
Nammineq akisussaasuusimasoq
Meeqqat nakorsaat pingasut Dronning Ingridip Napparsimmavissuani pissutsit pillugit ernumaateqarlutik oktober 2020-mi allagaqarmata Anna Wangenheim peqqissutsimut Naalakkersuisuuvoq.
Anna Wangenheimip nassuerutigaa allakkamut qisuariarnissaq sukkanerusimasinnaagaluartoq. Allakkalli paasisaqarfiginiariarlugit februar 2021-mi piaartumik ataatsimeeqatiginninnissamut pilersaarusiulersimagaluarluni.
- Piffissami tassani nammineq akisussaasuuvutit. Allakkat oktober 2020-mi nassiunneqaqqaarmata sooq ataatsimeeqatigisimanngiligit?
- Nakorsaanerit Naalakkersuisut siuliinit akisussitisisarsimannginneri takutitsinnguatsiarpoq allaffissornerup iluani unammillernartoqartoq, tamannalu ernumanarpoq. Tamakkumi pillugit politikerit ilisimatinneqartanngippata ajuusaarnarpoq, aamma soorunami ajuusaarpunga piffissaq sivitsoreertoq akissuteqarama, oqarpoq.
Ilisimagaluarlugu qisuarianngitsut
- Allakkalli ilisimasaqarfigilerniariarlugit piaartumik qisuariarfigaakka. Naalakkersuisoqarfiulli allakkat ukioq ataaseq sinnerlugu ilisimasaqarfigereersimalerpaat, imarisaali maanna naalakkersuisuusup suli qisuariarfiginngilai, naak piffissami sivisuumi akisussaaffimmik tigumminnereerluni, oqarpoq.
Anna Wangenheim nassuiaavoq meeqqat nakorsaannik februar 2021-mi ataatsimeeqateqarnissaq pilersaarusiorsimagaluarlugu. Qaammalli taanna Demokraatit naalakkersuisoqatigiinniit tunuarput.
Demokraatit peqqissutsimut oqaaseqartartuata ersarissumik ammasumillu suleqatigiinnissaq ujartorpaa piumasaralugulu nalilersuinernut suliat piffissamik aalajangersimasumik killilerneqassasut, meeqqat nakorsiarnissaannut pitsaassutsip qaffassarnissaanut suliat aallartilluarsinnaaqqullugit.