Meeqqanut Naalakkersuisoq stressimik eqqugaasoq

Eqaluk Høegh meeqqanut ilaqutariinnullu qaammatini arlaqanngitsuni Naalakkersuisooreerluni unikaallattariaqarsimavoq, stressernerminilu siunnersortitaarluni. Maanna ilorraap tungaanut aallarpoq, kisianni akisussaaffiisa ilaat naalakkersuisumut allamut tunniukkallarneqartariaqarput.

Naalakkersuisut siulittaasortaavata qinersinerup kingorna meeqqanut ilaqutariinnullu naalakkersuisoqarfimmik pilersitsilluni nalunaarutigimmagu nuannaarutigineqarpoq.

Naalakkersuisoqarfimmilu nutaami naalakkersuisunut ilaasortat nukarlersaata, inuusuttunut tv-mi aallakaatitassiortup, oqallissaarisup aaqqissuussaanermillu isornartorsiuisup, Eqaluk Høeghip, akisussaaffimmik tigusinera nuannarineqarpoq.

Kisianni nalunaaruteqarnerup kingorna innuttaasut Meeqqanut Ilaqutariinnullu Naalakkersuisumit tusagaqarpianngillat. Meeqqat ulluanni allaat oqariartuuteqartoqanngimmat amerlasuut tupigusuutigaat.

Maannalu naalakkersuisoqarfimmi inatsisinik atuutsitsinermut akisussaaffik Naaja Nathanielsenimut nuunneqarpoq.

Sakkortuumik tigusisoq
Eqaluk Høegh stressimik eqqugaasimalluni, maannakkullu tamakkiisumik sulileqqinnissaminik sulissuteqarluni,Sermitsiaq.AG-mut oqaluttuarpoq.

- Piffissami sivisuumi ulloq unnuarlu suliassaqarfinni sulivunga. Suliffik angerlarsimaffillu immikkoortinnissaat ajornakusoortissimavara, imminut aamma peqqinnera eqqarsaatiginnginnakkit stressimik eqqugaavunga, Meeqqanut, Ilaqutariinnermut Inatsisinillu Atuutsitsinermut Naalakkersuisoq oqaluttuarpoq.

Eqaluk Høegh inuiaqatigiinni naapertuutinngitsunik takusaqaraangami oqariartuuteqartarnerminit ilisimaneqarpoq. Naalakkersuisuusimasut meeqqanut navianartumiittunut naammaginanngitsumik iliuuseqartut, ilaatigut videoni tikkuartortarpai.

Timaa naammatsittoq
Kisianni suliat annertussusaat aamma suliat unitsinnaveertarnerinik unammillernartoqartitsineq ataatsikkoortillugit ingasappallaalerpoq.

Taamaammat naalakkersuisoq inuusuttoq kigaallattariaqalernermik eqqorneqarpoq.

- Tassanngaannaq ingasappallaalerpoq, timeralu naammatsippoq. Tamatuma kingunerani Naalakkersuisut Siulittaasuata oqaloqatiginerata kingorna ikiortissarsiorpunga.

Múte B. Egede isumasioqatigalugu, Eqaluk Høegh stressernermut siunnersorteqalerpoq.

- Oqaloqateqartarninnit iluaallattorujussuuvunga. Kisianni oqaloqateqartarninni aamma akisussaaffikka annikinnerulersittariaqarsimavakka, taamaammallu piffissami inatsisinik atuutsitsinermut akisussaaffik iperarnissaanik qinnuiginnippunga, Eqaluk Høegh oqarpoq, nangillunilu:

- Piffissaqarluartilluta qisuariarnerput nuannaarutigaara, pisariaqartitannillu ikiorneqarnera. Siumut ingerlavunga, qinersisartullu qinersinermi uannut tatiginninnerannut naammassinninniarlunga sukataarpunga.

Inatsisinik atuutsitsinermut akisussaaffiup Naaja Nathanielsenip naalakkersuisoqarfianut nuunneqarnissaa, pingasunngornermi nalunaarutigineqassaaq.