Meeqqanut kalaallinut katersuiniarnerartoq akuersissuteqanngitsoq

Ingerlataq Sort Snemik taaguuteqartoq, meeqqanut kalaallinut katersuiniarnerarpoq. Katersuiniarneq arlalitsigut pasinartoqarpoq. Akuersissummik amigaateqarpoq, taamaalillunilu katersuiniarneq inatsisinik unioqqutitsineruvoq.

Piffissami matumani inuk Kalaallit Nunaanni suliffeqarfinnut sianeqattaarpoq – kalaallinut meeqqanut katersuiniarnerarluni.

Kisianni ingerlataq, sortsne.dk-mik nittartagaqartoq, arlalitsigut pasinapiluttoqarpoq.

Katersuiniarneq Danmarkimi katersuiniarnernut aalajangiisartunit akuerineqanngilaq, tamannalu inerteqqutaavoq.

Tamatuma saniatigut peqatigiiffik Sort Sne, Peqatigiiffik Kalaallit Meerartaannut innersuussuteqarpoq.

- Taanna suleqatiginngilarput. Aatsaat tusaqqammerparput, kisianni ilisarisimanngilagut, allattoqarfimmi pisortaq Nike Berthelsen Sermitsiaq.AG-mut taama oqarpoq.

Sort Sne nittartakkamini allakkaluarpoq, ’inuussutissarsiortut klubbiata aamma Peqatigiiffik Kalaallit Meerartaasa akornanni ikinngutigiittut isumaqatigiissuteqarneq aamma periarfissaasoq. Inuussutissarsiortut klubbiat qanoq aamma sumi tapersiissanersoq isumaqatigiissutigineqassaaq, Peqatigiiffik Kalaallit Meerartaat illuanik qanoq tunniussaqassanersoq.’

Sort Snep sianeqattaarnermini normu atugaa Sermitsiaq.AG-p nassuiaatissarsiniarluni sianerfigaa.

Sulisoq akivoq, peqatigiiffillu suleqateqanngitsoq, kisianni nammineq aningaasanik agguaaniartoq nassuiaalluni. Nittartakkamilu oqaaseqatigiit pillugit aperineqarnermini akivoq, Peqatigiiffik Kalaallit Meerartaat suli suleqatigineqanngitsoq, kisianni pisortaa ’piareersaagunartoq’, taannalu sianersinnaannginnersoq.

Nittartagaq sortsne.dk Andreas Buskimit ullut arlaqanngitsut matuma siorna pilersinneqarpoq, tassa maajip 22-anni.

Oqaloqatigiinnerup siulliup qaangiunneranit minutsit qulit missaa ingerlareersut Andreas Hjort Busk sianerpoq. Sermitsiaq.AG aqagumut apersuinissaanik siunnersuuteqaraluarpoq, kisianni maanna oqaloqatiginissaa kissaatigaarput.

- Sooruna Katersuiniarnermut aalajangiisartut nittartagaanni akuerineqarsimasutut allaqqanngitsusi?

- Akuersissummik qinnuteqarnikuuvugut, taamaalilluni suliaq ingerlanneqarpoq.

- Qanga qinnuteqarpisi?

- Qaammatit marluk affarlu matuma siorna.

- Peqatigiiffik Kalaallit Meerartaat suleqatigalugu nittartakkami allakkissi peqatigiiffiup ilisimanngikkaasit tupigusuutigaara. Tamanna qanoq nassuiaatissartaqarpa?

- Allataq kukkusaavoq. Sulisoq taassuminnga allattoq kukkuvoq, Andreas Hjort Busk akivoq.

- Qanormi allaqqasussaagaluarpa?

- Siunissami Peqatigiiffik Kalaallit Meerartaat suleqatiginiarlugit anguniagarigipput.

- Tapersersussallusi aalajangeruma aningaasat sumut tussappat?

- Kalaallit Nunaanni meeqqanut tarnip pissusianik ilisimasalinnik ikiorsiinissamut, inuussuttunut nunani allani ilinniagaqarusuttunut aamma klubbini assigiinngitsuni misigisassarsiornernut.

- Tarnip pissusianik ilisimasalinnut isumaqatigiissuteqarpisi?

- Suli naamik, tamanna sulissutigaarput.

- Kubbinimmi?

- Tamanna aamma sulissutigaarput, aallarteqqammisorujussuuvugut.

- Ilinniarnermummi tunngatillugu isumaqatigiissutinik?

- Aningaasat taakku inummut toqqaannartumik tunniunneqartassapput, Andreas Hjort Busk oqarpoq, piffissap ingerlanerani qinnuteqarnissamut periarfissaqalerumaartoq taanna oqaluttuarpoq.

- Taava maanna aningaasanik piniarpusi, kisianni qanoq agguaanneqarnissaa naluarsi. Tamanna qanoq nassuiaatissartaqarpa?

- Amigaateqartunut nalunngisatsinnut tunniutissavagut, taanna akivoq.

- Peqquserlunniarpaluttumik tamanna nipeqartoq nammineq tusaasinnaavat, ilaa?

- Tamanna ilumuunngitsutut oqaatigisinnaavara.

Anders Hjort Busk maajip 14-anni Hjørringimi eqqartuussivimmit Bindslev Hotel IVS-imi ingerlatseqatigiiffimmi akiliisinnaajunnaartutut nalunaarutigineqarpoq.

- Ingerlatseqatigiiffik taanna katersuiniuppiuk?

- Tamanna ilumuunngitsutut oqaatigisinnaavara.

- Katersuiniarnermut aalajangiisartunut aqagu sianeruma, suliaq ingerlallugu uppernarsarsinnaassavaat?

- Taamaalluartussaassaaq.

Katersuiniarnermut akuersissummik qinnuteqaat nassiutissagaa qinnuigaara. Mailip adressia oqaatigigakku, Andreas Hjorth Buskip ’Sermitsiaq’ allassallugu ajornakusoortilluinnarpaa.

Kisianni qinnuteqaammut uppernarsaammik takkuttoqanngilaq. Illuanik allarluinnarmik mailimi nassuiaammik takkuttoqarpoq.

- Aningaasanik katersuinianngilagut, kisianni ilaasortaanissamut neqerooruteqarpugut, taakku Kalaallit Nunaanni suliniutinut agguaanneqartassapput, mailimi tamanna oqaatigineqarpoq.

- Taamaattumik katersuiniarnermut akuersissuteqartoqartariaqanngilaq, ilaasortaanermut allagartat taamaallaat tuniniarneqarmata.

- Suliniut kalaallit meerartaannik ikiuniarneruvoq, ilaasortaanerullu tamanna siunertaq tapersersinnaassagaa isumaqarpugut.

- Kikkut tapersissanerigut ilaasortat apeqqutaassapput.

- Taperserneqartussanut attaveqannginninni 100-nut sianerlunga suliniut misiliuteqarfigaara tamatuma qanoq pinissaa takuniarlugu.

Kinguninngua oqarasuaat sianeqqippoq.

Ilaasortanngorneq ’ajoqutissartaqanngitsoq’ Andreas Hjorth Buskip aalajangiusimavaa.

- Ilaasortaqalerniarputit, inuillu akiliisillugit, kisianni suliniutinik tapiissuteqarfissaqanngilatit?

- Tamanna oqaaseqarfiginianngilara.

Powered by Labrador CMS