Skip to main content

Meeqqanut inuusuttunullu Hjulmand aalatitsineroqataalissaaq

Meeqqanut inuusuttunullu aalanerunissamik suliniummi, Ataatsimoorluta Aalasami, danskit nunanut allanut unammisartuinut sungiusaasoq, Kasper Hjulmand aalatitseqataalissaaq. Tamanna pisinnaavoq GIF, Unicef Kalaallit Nunaanni, Paarisa, KNI, Politiit aammalu Innuttaasut Peqqissusianik Ilisimatusarfik annertuumik suleqatigiinnermik aallartitsinerisigut.

Ataatsimoorluta Aalasa ullumi nalunaaqutaq sisamanut Katuami saqqummiunneqarpoq. Saqqummiunneqarnerani Unicef aamma GIF (Timersoqatigiit Kattuffiat) siulittaasoqatigiinnit ilaasortaq, Kasper Hjulmand, Danmarkimi angutit arsartartut nunanut allanut unammisartuisa sungiusaasuannit tikeraartoqarput.

- Maligassiusisut Akutaaneq Kreutzmanna aamma Vivi Flesicher peqatigalugit suleqatigiinneq aallartissavaat klubbinut/peqatigiiffinnut ilaasortaaneq, meeqqanut tamanut inissaqartitsisup, pitsaasup toqqissisimanartullu pingaaruteqarnera sammissallugu, GIF aamma Unicef tusagassiuutinut nalunaarummi taama allapput. 

Meeqqat tamarmik peqataasinnaasariaqarput

Suliniut meeqqat pisinnaatitaaffii aallaavigalugit toqqissisimasumik ataatsimoortitsisinnaanermik aallaaveqarpoq. Taamaammat timersornermi sungiusaasut meeqqanik inuusuttuaqqanillu sullissisut pinerlussimannginnermut uppernarsaatinik aallertoqarsinnaanera qulakkeerniarlugu politiit suleqatigineqarput.

- Nalunngilarput timersornerup qanoq ililluni ataatsimuussusermik meeqqanut inuusuttunullu misigisitsisartoq. Aammattaaq timersorneq aalanerlu peqqinnartuuvoq, takorluugaraarpullu 2030-mi nunarsuarmi nunani tamani aalanerpaanissarput. Ataatsimuussusermulli pulatitsiniaraanni periutsit nutaarluinnaat atugassaapput, uunalu suliniut iluaqutaassaaq, Timersoqatigiit kattuffianni pisortaasup, Jonas Jensenip oqaatigaa.

Meeqqat pisinnaatitaaffii KNI-mi sulisunut ilinniarneqassapput

Ataatsimoorluta Aalasa nunaqarfinnut illoqarfinnullu tamanut siammarterniarneqarpoq. Tamannalu piviusunngortinneqassaaq KNI-mi sulisut meeqqat pisinnaatitaaffii pillugit ilisimasaqarnerulerneranik. Pisiniarfinni sulisut meeqqat pisinnaatitaaffii alanngaarsinnaalissavaat, suliffeqarfiup soorlu meeqqanut immikkoortitsisinnaanerat pinaveersaarniarlugu. Tamannalu nunaqarfinni illoqarfinnilu meeqqanut inuusuttunullu toqqissisimanermik, peqqinnarnerusumik inuulernissamut, peqataatitsinerusumillu sinaakkusisinnaasoq, Unicefimiit isumaqarput. 

- Unicef, GIF, Paarisa aamma KNI tamarmik immikkut suliffeqarfiupput nukittuffeqartut, meeqqallu timersonermi toqqissisimanartumik peqataatitsisumillu avatangiiseqarnissaannik qulakkeerinninnikkut sunneeqataalluarsinnaapput. Ataatsimoorluta timersorneq, meeqqat pisinnaatitaaffiinik ilisimasaqartunik sungiusaasulik, kajumissutsimik sulisoqarlunilu atorfilittalik toqqissisimanartunik avatangiisilik qulakkiissavarput, taamak UNICEF Kalaallit Nunaanni suliniutini pisortaq, Maliina Abelsen, oqarpoq.

Sungiusaasut kajumissutsiminnillu suliallit ukkatarineqassapput

Suliniaqatigiiffiit suliffeqarfiillu angisuut meeqqat inuusuttullu aalanerulernissaanik kajumissaarissapput. Taamaammat sungiusaasut namminneq kajumissutsiminnillu suliaqartut piginnaasaat qaffassartuarnissaat, soorlu meeqqanik sulissinermi meeqqallu akornanni kajumissaarinermi pikkorissarneqartassapput. 

- Una suleqatigiinneq peqqinnartunik peqataatitsisunillu peqatigiinnissanik inersimasunik meeqqanik toqqissisimatitsisunut tunngasoq peqqinnissamut siuarsaataavoq Inuuneritta III-p siunertaanut, meeqqanut sunngiffimmi sammisassanik timimik aalatitsisumik pilersitsisoqarnissaanut, naleqquttorujussuuvoq. Taamaammat GIF, Unicef, KNI aamma Innuttaasut Peqqissusiannik Ilisimatusafiup suleqatigilerneri nuannaarutigeqaarput. Taamaalilluta ilisimasat, nukissat piginnaanerillu assigiinngitsut atorlugit meeqqat inuunerinnissaannik anguniakkatta anguniarnerani periarfissaqalerpugut, Paarisami immikkoortortaqarfimmi aqutsisuugallartoq, Tina Evaldsen, oqarpoq.

Innuttaasut Peqqissusiannik Ilisimatusarfiup suleqatiginerani ineriartortitsineq aammalu suliniummi suliat nalunaarsornissaat suliniummi tamakkiisumik ilisimasanik tunngavissiisuussaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER