Meeqqanut inissinneqarsimasunut suliniut nutaaq

Meeqqat Ikiortigit - Red Barnet Kalaallit Nunaat-a 2015-imi nuna tamakkerlugu katersuiniarnermi isertitai atorlugit pernaammik suliniut ´Meeqqat tamarmik angerlarsimaffeqarnissaminnut pisussaaffeqarput´ Nuummi aallartinneqarpoq.

Suliniummut pisortaq nutaaq
Meeqqat Ikiortigit suliniutaanut pisortartaavata Kamilla Falsted Dihle-p suliniut ingerlallugulu ineriartortissavaa.
Suliniummi siunertaavoq meeqqat inissinneqarsimasut angajoqqaavisalu akornanni attaveqaqatigiinnerup nukittorsarnissaa. Toqqissisimasunillu avatangiiseqarluni atortussallu eqqortut ineriartortinnerisigut suliniutikkut meeqqat inissinneqarsimasut angajoqqaavilu pitsaasunik misigisaqartarnissaat siuarsassavaa, Meeqqat Ikiortigit erseqqissaavoq.

Siulersuisuunerit nutaat
Meeqqat Ikiortigit septembarip 28-anni peqatigiiffiup sinniisuisa ataatsimeersuarneranni nutaamik siulersuisuunertaarpoq.

Taakkua tassaapput siulittaasoq Cecilie Rudbeck, siulittaasup tullia Jesper Schrøder, aningaaserisoq Emil Skjervedal, Aaja Chemnitz Larsen, Rebekka Bisgaard, Katen Schleiss, Arian Kleist sinniisussarlu Anne Marie Lei.