Meeqqanut inissiisarnernut aningaasartuutit amerleriarujussuartut

Kommuneqarfik Sermersuumi meeqqanut ilaqutariinnullu suliassaqarfimmut aningaasartuutit ukiuni marlunni kingullerniinnaq 65 mio. kr.-nik amerleriarput. Kommunip aningaasaqarneranut unammilligassarujussuuvoq, ingerlatsiveqarfik nalunaarpoq.

Kommuneqarfik Sermersuup meeqqanik angerlarsimaffiup avataanut inissiisarnernut qaammammut agguaqatigiissillugu 20 mio. kr.-t ataatilaarlugit atortarpai.

Illoqarfiit pingaarnersaata kommuniani Meeqqanut Ilaqutariinnullu suliassaqarfimmut aningaasartuutit amerleriarput.

Kvartalimi siullermi aningaasaqarnerup misissorneqarnerata kingorna Kommuneqarfik Sermersuumi ingerlatsivik ingerlatsinermi suliassaqarfinnut assigiinngitsunut agguataarlugit saniatigut 68 mio. kr.-nik piumasaqartariaqarsimavoq.

Aningaasartuutit annerit ilagaat meeqqanik angerlarsimaffiup avataanut inissiisarnernut saniatigut 20 mio. kr.-nit. Kommunimi ingerlatsivimmi aningaasaqarnermut ataatsimiititaliamut inassuteqaammi tamanna takuneqarsinnaavoq.

Kommuni 2023-mi meeqqanut inissiisarnernut 213 mio. kr.-nit missaanniittunik immikkoortitsisimavoq, kisianni 2022-mi inerneri qaffasinnerujussuupput, taamaattumillu aningaasaliissutit amerlineqassapput. Ingerlatsivimmi qaffariaatissat annertupput, ingerlatsivik nalunaaruteqarpoq:

- Aningaasaqarnermut unammillernartoq

- Ukiuni kingullerni marlunni Meeqqanut Ilaqutariinnullu suliassaqarfimmi aningaasaliissuteqarnerunissamut pisariaqartitsineq 65 mio. koruunit missaannut qaffassimavoq, tamannalu kommunip aningaasaqarneranut unammillernarpoq, ingerlatsivik politikerinut pissutsit pillugit allappoq.

Kommuneqarfik Sermersuup inissiisarnernuinnaq qaammammut 20 mio. kr.-nit ikinnerulaartut atortarpai:

- Inissiinernut agguaqatigiissillugu 20 mio. inulaarlugit qaammammut atorneqartarput, inissiinerillu amerlerialaarsimanerat, akigititat qaffassimanerat kiisalu suliniutini/ulloq unnuarlu paaqqinnittarfinni namminersortuni suliniutit nikinganerulersimanerat (aaqqiissutit akisunerusut) sanilliukkaanni 20 mio. koruunit missaanni amigaatigineqalissapput, ingerlatsivik aningaasaqarnermut ataatsimiititaliamut allappoq.

Ikiortarialinnut ineqarnermut akiliutinut aningaasartuutit missingersuuteqalertut

Meeqqanik inissiisarnernut aningaasartuutit qaffannerisa saniatigut aamma angajoqqaat ikiortariallit ineqarnerannut akiliussisarnermut aningaasartuutit amerleriarput. Inatsit nutaaq malillugu angajoqqaat ikiortariallit kommunip ineqarnerat akilersinnaavaat, ilaqutariit angerlarsimaffeqanngitsunngornissaat pinngitsoortinniarlugu. Angerlarsimaffeqanngitsuuneq meeqqanut iluaqutaanaviannginnera tunngavigalugu, pisinnaatitaaffik atulersinneqarnikuuvoq.

Ingerlatsivik tassunga saniatigut 4 millionit koruuninik piumasaqarpoq:

- Angajoqqaat angerlarsimaffeqanngippata meeqqap pisariaqartitai qulaajaruminaattarmata isumaginninnikkut ineqarnermut akiligassaasinnaasut matussusernissaat pitsaanerusinnaasarpoq.

- Tassa angajoqqaat nalinginnaasumik meeqqat pisariaqartitaannik isumaginnissinnaagaangata ineqarnermullu tunngasut kisimik ajornartorsiutaagaangata, ingerlatsivik allappoq.

Kommunip akiliisinnaassusaa appartikkaa

Ingerlatsivik aamma inunnut innarluutilinnut sullissinermi ulloq unnuarlu paaqqinnittarfinnut inissiinernut ilassutitut 10,8 mio. kr.-nik piumasaqarpoq, kiisalu utoqqarnik sullissinermi 9 mio. kr.-nik, tassa utoqqaat pisariaqartitsisut amerleriarnerisa kinguneranik.

Kommunip namminersortunut inissianik sulisunut innuttaasunullu attartorluni attartortitaanut assigiinngitsumik kukkulluni ineqarnermut akiliuteqartitsineq pissutigalugu 17 mio. kr.-nik aningaasaliinerit amigartinneqarsimapput. Tamanna aamma iluarsineqassaaq.

Ingerlatsivik katillugit 68 mio. kr.-nik ilassutinik piumasaqarpoq, kommunillu ukiup aningaasaqarnera pilersaarutaasumit appasinnerungaatsiassasoq naatsorsuutigineqarpoq:

- Ukiup naaneranut kommunimi aningaasat tigoriaannaat, missingersuutaareersimasunut 103 mio. koruuninut sanilliullugit, 35 mio. koruuniunissaat maanna naatsorsuutigineqarpoq, ingerlatsivik nalunaarpoq.

Powered by Labrador CMS