Meeqqanut ilinniartiaanermullu ataartsimiititaliaq: Atuartut danskit oqaasiinik attassiinnassapput

Kalaallit atuartorpassuit ingerlaqqiffiusumik ilinniagaqassappata danskit oqaasii pingaaruteqarluinnarput, taamaammat meeqqat danskit oqaasiinik attassiinnarnissaat pingaaruteqarpoq, taamatu Folketingimi meeqqanut ilinniartitaanermullu ataatsimiititaliamit oqartoqarpoq. Siulittaasup erseqqissaassutigaa, ilinniartitaanermut oqartussaaffiup angelaanneqarsimanera ataqqineqarluinnarneqartoq.

Ilinniartitaanermut oqartussaaffiup angerlaanneqarsimanera ataqqilluinnarparput, ataatsimiititaliami siulittaasoq oqarpoq.

Folketingimi Meeqqanut Ilinniartitaanermullu Ataatsimiititaliaq marloriarluni Kalaallit Nunaanni paasisassarluni angalasimavoq. Kingullermik septembarip qaammataani politikkerit Kujataanut tikeraarput.

Ataatsimiititaliamit Naalagaaffeqatigiinni meeqqat atuarfianni atuartut pitsaanerpaamik qanoq ilisimasaqarfigineqarlersinnaanerat pillugu kalaallit susassaqartut oqaloqatigineqarsimapput. Tamannalu pillugu nalunaarusiortoqarsimalluni.

Nalunaarusiamut taaguusiunneqarsimavoq, Kalaallit Nunaanni Danmarkimilu meeqqat inuusuttullu attaveqatigiittarnerisa nukittorsarneqarnissaanut aningaasaliissuteqarneq. Ataatsimiititaliamilu ilaasortat Kalaallit Nunaanni atuartitsisarnerup pitsaassusaa qaffakkiartoraluartoq misigisimapput, danskit oqaasii kalaallit atuartut ingerlaqqiffiusumik ilinniagaqarnissaannut suli pingaaruteqartut.

Akuliunnianngitsoq

Taamaammat danskit oqaasiisa maanna ilinniartitaanermik aaqqissuussap iluani atuinnarneqarnissaat pingaaruteqarpoq, minnerunngitsumik kalaallit meerartaasa Danmarkimi ilinniagaqarnissamut ilinniaqqinnissamullu periarfissagissaarnerunissaat qulakkeerniarlugu, ataatsimiititaliamit oqaatigneqarpoq.

Meeqqanut Ilinniartitaanermullu Ataatsimiititaliami siulittaasup Anders Kronborgip (S) Sermitsiaq.AG--mut itisiliilluni oqaatigaa, piviusorsiornissaq pingaaruteqartoq.

- Kalaallit Nunaanni ilinniartitaanermut aaqqissuussaq soorunami akuliuffigissanngilarput. Danmarkimili universitetini ilinniartorpassuusartut eqqarsaatigalugit piviusorsiortariaqarpugut, Danmarkimi miliuunilinnik innuttaqarami, taanna oqarpoq, nangillunilu:

- Soorunami Danmarkimi ilinniartitaaneq danskisut ingerlanneqartarpoq. Tamannalu kalaallit meerartaannut danskisoorsinnaanngitsunut Danmarkimi akeqanngitsumik ilinniagaqarniartunut nalorninarnerusinnaavoq. Tamannalu soorunami eqqumaffigineqartariaqarpoq, ilinniartitaanermulli oqartussaaffiup angerlaanneqarsimanera ataqqilluinnarparput, taanna erseqqissaassuteqarpoq.

Powered by Labrador CMS