Meeqqanut atugassarititat Naalagaaffiit Peqatigiit paasisimasaqarneruffigilerpaat

Nunatsinni meeqqat atugaat pillugit Meeqqat illersuisuata Aviâja Egede Lyngep naalagaaffiit peqatigiit meeqqat pisinnaatitaaffii pillugit ataatsimiititaliaanut paasissutissiissalluni periarfissinneqarpoq.

Naalagaaffeqatigiit nalunaarusiornerannut atatillugu MIO nalunaarusiorsimavoq, taassumalu malitsigisaanik ataatsimeeqatiserineqarluni.

Atuaruk: MIO meeqqat atugaannik piviusunik FN-imut takutitsiniarpoq

- Kalaallit Nunaat misilitsissaaq danskit naalagaaffiata ilaatut. Nammineq saqqummiinissatsinnik periarfissinneqarnissarput apeqqutinillu Kalaallit Nunaanni meeqqat pillugit pingaarutilinnik akissuteqarnissarput pingaartinneqartoq ersarippoq, Aviâja Egede Lyngep FN’ip Meeqqat pisinnaatitaaffii pillugit Ataatsimiititaliaanik ataatsimeeqateqareernermi kingorna oqarpoq.

Kalaallit Nunaata Danmarkilu annertuumik assigiinngissuteqarneri ataatsimiititaliap ilisimanissaanik pingaaruteqartunik, soorlu aaqqissuussinikkut, nukissaqarnikkut kulturikkullu assigiinngissutsinik meeqqat illersuisuiat nassuiaateqarpoq.

Namminersorlutik Oqartussat Nunatsinni periusissiat assigiinngitsut naalagaaffiit peqatigiinnut nalunaarusiornerminni eqqartugaat MIO-p isaanit piviusumit allaanerunerat nalunaarusiaminni ersersippaat.

- Nunami inatsisit atuutsitsinerlu assigiinngissuteqartorujussuupput, meeqqat illersuisuat naqissusiivoq.

Atuaruk: MIO Naalagaaffiit Peqatigiinnut: Meeqqat imminiiginnarneqarput

Naalagaaffiit Peqatigiit suliaat Nunatsinni meeqqanut sumiginnakkanut ikiuutaasinnaasoq isumaqarpoq.

- Naalagaaffiit Peqatigiit Meeqqat pillugit Ataatsimiititaliaa, aamma Kalaallit Nunaannut, meeqqat atugaasa pitsanngorsarnissaannut pingaaruteqartorujussuuvoq. Taamaammat pingaaruteqarpoq paasissagaat unammillikkagullu takussagaat uagut isigut aallaavigalugit, Aviâja Egede Lynge oqarpoq.

Naalagaaffiit Peqatigiit Meeqqat pillugit Ataatsimiititaliaata Naalakkersuisunut apeqquteqaasiornissaa ukiaru pissaaq.