Meeqqanut atornerluinerit: Nalunaarutiginninnerit amerleriarujussuartut
Meeqqat 15-it inorlugit ukiulinnut kinguaassiuutitigut kannguttaatsuliorsimanerit pillugit ukioq manna ukiup affaani siullermi nalunaarutiginninnerit 2019-imit ukioq iluitsumi nalunaarutiginninnernit amerlanerupput.
Kalaallit Nunaata Politiivi 2016-imit 2019-ip tungaanut meeqqanut kinguaassiuutitigut kannguttaatsuliortoqarsimanera pillugu ukiumut agguaqatigiissillugu 75.75-inik nalunaarutiginninnernik tigusaqartarpoq. 2020-mili ukiup affaani siullermi meeqqat 15-it inorlugit ukiullit kinguaassiuutitigut atoqatigineqarsimasut pillugit nalunaarutiginninnerit 82-it tiguneqareersimapput.
Kisitsisit Sermitsiaq.AG-p Kalaallit Nunaata Politiivinit allagaatinik takunnissinnaaneq aqqutigalugu pissarsiaanit tamanna takuneqarsinnaavoq.
"Ernumanarluinnartoq"
Kisitsisit soorunami ”annertuumik ernumatitsilerput”, politimester Bjørn Tegner Bay Sermitsiaq.AG-mut erseqqissaavoq.
- Immaqa eqqumiiginarsinnaavoq, kisianni ukiukitsumik kinguaassiuutitigut atoqateqartoqarsimaneranut nalunaarutiginninnerit amerliarsimanerat ernumalersitsinngilaq. Kinguaassiuutitigulli kannguttaatsuliornerit amerlassusaat, misissuinerit aamma takutittareersimasaat, ernumalersitsivoq. Misissuinerimmi ilaasa takutippaat innuttaasut 20-40 procentii 18-inik ukioqalertigatik kinguaassiuutitigut kannguttaatsuliorfigitissimasartut, Bjørn Tegner Bay oqarpoq.
Kinguaassiuutitigut kannguttaatsuliortoqarsimatillugu nalunaarutiginninnerit amerleriarsimanerat pitsaasutut isigaa.
- Suliani paqumiginninnerit nipangiussisarnerlu atorunnaariartortut oqartoqarsinnaavoq, nalunaarutiginninnerit amerlimmata. Taamaasillutik pinerliinerit nalunaarutigineqanngitsoortut ikiliartortutut nalilersinnaavagut, Bjørn Tegner Bay nassuiaavoq.
Pinerlineqarsimasut ikiorneqassasut
Politimesterip erseqqissarpaa "nalunaarutiginninnerit amerleriarsimanerat kinguaassiuutitigut kannguttaatsuliorsimanerit amerleriarsimanerannik ersiutaanngitsutut nalilerlugu".
- Taamaattumik neriuuteqarpunga - tunuliaqutaq erloqinaraluarpalluunniit - pinerliinerit amerlanerusut saqqummertalertut, taamaasillutik pinerlineqartut ikiorneqarsinnaalerlutik, pinerliisimasullu tigusarineqarsinnaalerlutik, Bjørn Tegner Bay oqarpoq.
Kinguaassiuutitigut atornerluinerit, kinguaassiutitigullu kannguttaatsuliornerit allat nalunaarutigineqartut aamma amerleriarsimapput.