meeqqanik ussassaarisartut
Meeqqanik ussassaarisartut politiit misissuiffigaat
Ippassaq Nuummi Ukaliusap atuarfiata qanitaani meeqqat atuaqatigiit usserneqarsimanerat pillugu unnerluutiginnittoqarsimanera sisamanngornermi, politiit uppernarsarpaat.
Ippassaq pingasunngornermi Nuummi Ukaliusap atuarfiata qanitaani pisoqarsimanera immikkut suliarineqartoq, Nuummi politiit oqaluttuaraat.
Atuaruk: Meeqqat annilaartinneqartut: Meeqqanik ussassaarisoqartoq
- Pimoorullugu suliarivarput, Meeqqat biilimik malersorneqarsimapput, taama ittumik siornatigut suliaqarsimanngilagut, Nuummi politiit sillimasuisa pisortaat oqarpoq.
Takunnissimasimasinnaasumik massakkut oqaloqateqarnissarput sulissutigaarput, politiit paasissutissiipput.
- Massakkorpiaq oqaaseqaqqissinnaanngikkallarpugut, sillimasut ittuat oqarpoq.
Aningaasanik ussassaarneqartut
Meeqqat tamarmik 3. klassemi atuartuupput angutinilli ilisimaneqanngitsunit pingasunngormat soraarnerisa kingorna ussassaarneqarsimangaluarlutik.
Taakku 200 aamma 500 koruuninit aningaasat ussassaarutigisimavaat, meeqqallu naapertorlugit, angutit taakku marluullutik, meeqqat biilimut qernertumut ikitinniarsarisimangaluarpaat.
Biilip bussi malissimavaa
Meeqqat marluk iinniartitsisuminnut bussit unittarfiata eqqaani najugaqartumut ornigutipallassimapput.
Atuartut allat marluk busserlutik angerlarsimapput, meeqqallu naapertorlugit biilip taartup malersorsimavaat.