Skip to main content

Meeqqanik atornerluisut sakkortunerusumik pineqaatissittalernissaat siunnersuutigaa

Meeqqanik atornerluisarnerup qaangerniarnissaanut suliniutinik nutaanik Siumumeersoq Jens-Erik Kirkegaard ujartuivoq

– Inuit meeqqanik kinguaassiuutitigut atornerluisimasut sakkortunerusumik pineqaatissinneqartalernissaannut piffissanngunngila? Piffissanngunngila tamakkua ukiuni 10-15-20-ni pinerluuteqarsimasunut inissiisarfimmiitittalernissaannut? Kemiskimik issuersitsisarneq Kalaallit Nunaanni periarfissaassanngila?

Pisinnaatitaaffinnik unioqqutitsinerit

Apeqqutinik tamakkuninnga saqqummiussivoq Siumumeersoq Jens-Erik Kirkegaard, piffissami kingullermi Avannaani meeqqat atugaat oqallisigineqareersut, tamatumani meeqqat illersuisuata oqaatigimmagu meeqqat pisinnaatitaaffii unioqqutinneqartartut.

– Aperisariaqarpunga, sooq meeqqat pilliutigineqassappat inersimasut pisariaqartitaat naammassiniaannarlugit. Aanngajaarutinik atornerluisut qassiuppammitaava misigisaminnik, peroriartornerminni misigisarsimasatik sussaanngitsut puigorniarlugit? Qassimmitaava imminnut tatigiunnaarsimappat, allaallu imminut toqussimasut qassiuppammitaava? Pissutsit tamakkua massakkut unitsittariaqarput! Naalakkersuisunut ilaasortaasimasoq oqarpoq, taannalu isumaqarpoq inuiaqatigiit soriarsinnaajunnaarsimasut.

Iluatsiinngitsoq

– Oqartariaqarpoq maanna inuiaqatigiit aaqqissuussaanerat sorpassuartigut iluatsinngitsoorsimasoq. Tamanna erseqqissarneqarpoq kinguaassiuutitigut atornerluinermik nalunaarsiarpassuartigut kiisalu inuiaqatigiinni hashimik atornerluinerujussuarmik. Ukiorpassuarni kingullerni misissuisarnerit assigiinngitsut takuteqattaartuartarsimavaat sumik ajortoqartoq. Suliniutaasarsimasut assigiinngitsut naammattarsimanngillat iluatsittarsimanatilluunniit, politikeri Siumumeersoq oqarpoq.

Nutaamik eqqarsarluni

Taamaattumik allaanerusumik eqqarsalernissamut piffissanngorpoq, taanna isumaqarpoq.

– Eqqartuusseriaaserput, inuiaqatigiinnut akulerutsitseqqinnissamik tunngavilik maanna atuuttoq iluaqutissartaqarpoq. Meeqqanilli kinguaassiuutitigut atornerluinermik pinerlunnerit ima erloqinartigaat maanna eqqartuusseriaaserput atorsinnaanani, Knud-Erik Kirkegaard oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER