Meeqqamut innarluutilimmut anaanaasoq: Angalaniarneq kipiluttunarlunilu ilungersunartarpoq

Najaaraq Stephensen ernini qulingiluanik ilagalugu Nanortalimmiit Qaqortumut, Nuummut imaluunniit Danmarkimut angalassagaangami piareersarluartariaqartarpoq.

- Angalanissaq sioqqullugu piareersartariaqartarpunga. Angalanermi aqqusaagassagut eqqarsaatigisarpakka, atugassat kipiluttunarsinnaasarpoq meeraq innarluuteqartoq angalaqatigissallugu.

Angalakulapput, ukiumut arlaleriarlutik angalasinnaasarlutik.

Najaaraq Stephensenip ernera qiteralimmigut nakkartoornermik innarluuteqarluni inunngorpoq. Ernera pisulaarsinnaavoq, amerlanertigulli kørestoliminiittarpoq pisunniarneq erloqinarsinnaammat anniartitsingaatsiartarlunilu.

- Nalinginnaasumik pisulinngisaannassaaq, innarluuteqarninilu pissutigalugu suli maannamut nangeqarpoq, Najaaraq Stephensen Sermitsiaq.ag-mut oqaluttuarpoq.

Taanna oqaluttuarpoq nammineerluni Kalaallit Nunaanni ilisarisimasaqarnani taama angitigisumik meeralimmik suli nangeqartumik. Taamaammat ilaanni kiserliorneq misigisarpaa. Amerlanertigulli ingerlalluartutut misigivoq, ernerami ulluinnarni atuarfimmilu ingerlalluarpoq.

Angalanermi unammilligassat

Nuummut Danmarkimulluunniit angalaneq sivisusinnaasarpoq.

Narsarsuup tungaanut akunnerni tallimani arfinilinniluunniit Targami ingerlaarsinnaasarput, iluatsitsillutik Qaqortup tungaanut qulimiguulimmik akunnerup affaani ilaaqqaassanngikkunik, tassanngaanniillu Narsarsuup tungaanut akunnerni pingasuni sisamaniluunniit Targamik ilaallutik.

Narsarsuarmiit Air Greenlandip timmisartuanik Nuummukartarput, Danmarkimullu rigshospitaliliassagunik Kangerlussualiartarlutik. Kangerlussuarmiillu Københavnimut timmisartortarlutik. Misissortinnerillu nakorsartinnerillu naammassippata, aqqut taanna atorlugu Nanortalimmut angalasarput.

- Nanortalimmi Qaqortumilu utaqqisarfeqanngilaq iserfiusinnaasunik. Targamut ilaassagaangatta silami utaqqisariaqartarpugut. Targamut ikiniarneq aamma imaaliallaannangassaanngilaq, anaanaasoq oqaluttuarpoq.

Anaanaasup oqaluttuaa inuit innarluutillit illersuisuata kujataani angalanerminit nalunaarusiaanit taperserneqarpoq. Illoqarfiit nunaqarfiillu akornanni angalaniarneq inunnut innarluutilinnut kipiluttunarsinnaasoq nalunaarusiami allassimavoq.

Anartarfiit tulluarsarnerusinnaapput

Najaaraq Stephensen oqaluttuarpoq ernerata nangia akunnermut ataasiarlugu taarsertariaqartartoq. Targami ilaatilluni allatut ajornartumik ilaasut isigisut taarsiisariaqartarpoq, allanik periarfissaqanngimmat.

- Timmisartut anartarfiini taarsiisinnaasarpugut, tattoqisaannaraluartoq. Soorunami taanna atortarparput. Anaanatulli kipiluttunarpoq allat isigisut ernera qulingiluanik ukiulik nangilersortariaqartarakku, nassuiaavoq.

Taanna oqaluttuarpoq Air Greenlandimi sullissineq pitsaanerulluinnartoq, Targamik angalanerminngaanniit.

Inuilli innarluutillit angalanerminni inissaqartilluarneqarnerunissaat pillugu marlussunnik kaammattuuteqarpoq.

- Siullermik, aallariartortarfiit tamarmik utaqqisarfeqartuuppata angalanerput oqinnerussagaluaqaaq. Uagutsinnuinnaanngitsoq, aammali utoqqarnut allanullu angalasunut. Utoqqaammi pitsorlulereersut qasuersaarfeqartariaqartullu aamma angalasarput, oqarpoq.

- Aappaattut, timmisartuni anartarfiit inunnut innarluutilinnut tulluarsarsimasut amigaataapput. Nalunngilara periarfissaqartoq, pitsaanerusinnaappulli.

Najaaraq Stephensen oqaluttuarpoq erninilu upernaakku 2020-imi Danmarkiliaqqissallutik. Neriuutigaa ernera suliaritilluni quisarfilersinnaassasoq, nangeqarunnaarniassagami.