May: Isumaqatigiissutip itigartinneqarpat brexit pisinnaassanngilaq
Taasinissaq pingaaruteqartoq sioqqullugu tuluit parlamentianni ilaasortaasut EU-mut isumaqatigiissummut itigartitsinissamik taasissallutik eqqarsarpata Theresa Mayip mianersoqquai.
Theresa Mayip brexit pillugu isumaqatigiissutaa EU-mit isumaqatigiissutinik qulakkeerinnittunik tapiliussaqarfigineqarsimasoq tuluit inatsisartuisa marlunngornermi unnukkut itigartitsissutigalugu taasissutigippassuk, taava Tuluit Nunaata EU qimassinnaassanngilaa.
May Underhusimi, Tuluit Nunaata inatsisartuini, marlunngornermi ualikkut oqarpoq, akunnialuit qaangiuppata inatsisartunut ilaasortat isumaqatigiissut pillugu aappassaaneerlutik taasissapput.
- Isumaqatigiissut akuerineqanngippat, brexit annaassavarput, May oqarpoq.
May ataasinngornermi unnukkut Strasbourgimiippoq, EU-p neriorsuutai arlallit qulakkeerumallugit.
Isumaqatigiissummut tapiliunneqartut EU-p Ataatsimiititaliarsuata siulittaasua, Jean-Claude Juncker peqatigalugu ataasinngornermi unnukkut tusagassiortunik katersortitsinermi saqqummiuppai.
May isumaqarpoq EU-mit qularnaveeqquserneqarsimalluni. Kinguartitsigallarnissamut tunngatillugu oqaluuserineqangaatsiarsimasoq ilanngullugu qularnaveeqquserneqarsimavoq.
Tamassumunnga Labourip siulittaasua, Jeremy Corbyn, isumaqataanngilaq.
- Ministeriunerup isumaqatiginninniarnerigalua iluatsissimanngilaq. Theresa Mayip parlamentimi ilaasortat neriorsorpai allannguuteqartoqassasoq, EU-mulli isumaqatigiissutit ippassaq saqqummiunneqartut allannguutinik imaqanngillat, Corbyn oqarpoq.
Tuluit parlamentia marlunngornermi nalunaaqutaq 20:00 missaani Mayip isumaqatigiissutaa pillugu taasisussaassangatinneqarput.
Naatsorsuutigineqarsinnaavoq isumaqatigiissut itigartitsissutigineqassasoq. Nordirlandimiut partiiat DUP politikerillu konservativiusut arlallit European Research Groupimiittut oqareerput itigartitsillutik taasiniarlutik.
Jean-Claude Junckerilli tuluit inatsisartuisa Mayip EU-mut isumaqatigiissutaanik itigartitsinnginnissaanut mianersoqquai.
- Qinersinissaq ersarippoq: Isumaqatigiissut aajuna, taamaanngippat brexiteqassanngilaq. Tuluit Nunaat torersumik anisinniartigu, ataasinngornermi oqarpoq.
Juncker EU-p præsidentianut Donald Tuskimut allagaqaateqarluni erseqqissaavoq Tuluit Nunaat europaparlamentimut qinersinnginnermi anereertariaqassasoq, nunat EU-mut ilaasortaasut maajip 23-aniit 26-at ilanngullugu qinersissapput.
Tuluit piffissaq taanna nallertinnagu anereersimanngippata, Tuluit Nunaanni Europa-Parlamentimut aamma qinersisoqassaaq.
/ritzau/AFP