Skip to main content

Mattussaaqqaneq: Angerlarsimaninni ima timersorsinnaavutit

Coronavirusip ajornartoortitsinerata nalaani timigissartarfiit matoqqaneraq timigissarnissap unitsiinnarnissaanut utoqqatsissutaasariaqanngilaq. Crossfit Inua ilaasortaminut ullut tamaasa sungiusagassanik tunniussaqartarpoq.

Angerlarsimalluni atuartinneqarneq. Angerlarsimalluni sulineq. Angerlarsimallunilu timigissarneq aamma periarfissaavoq.

Inuiaqatigiit unitsikkallarneqarneranni atortorissaarutit nutaaliaanerpaat atunngikkaluarlugit timersortoqarsinnaavoq, Camilla Nymand Petersen, Crossfit Inuami piginneqataasoq sungiusaasorlu taama oqarpoq.

- Angerlarsimaffimmi timigissarniarluni atortorpassuaqartoqartariaqanngilaq. Mavebøjning, squats, armbøjning, burpees, rygbøjningilu atorneqarsinnaapput, Camilla Nymand Petersen oqaluttuarpoq.

Crossfit Inua coronavirusip tuniluuteratarsinnaanera aarleqqutigalugu martsip 16-anili matuvoq. Crossfit Inuamili ilaasortaasut mobilimi app timigissartarfiullu Facebookimi quppernera atorlugu, ullut tamaasa sungiusaatinik videonik pissarsisarput.

Sungiusaasoq nassuiaavoq videoni sungiusagassatut takutinneqartut timigissarnermik misilittagaqarluartunut ilaanni tulluarnerusinnaasut, taamaattorli angerlarsimalluni timersornermi isumassarsiorfiusinnaallutik.

- Timersorneq pingaaruteqarpoq. Tarnimut timimullu peqqinnarpoq. Meeqqat timersoqatigineqarsinnaapput, taamaalilluni atuartut eqaarsaarnerannut taarsiunneqarsinnaalluni, meeqqallu timiminik aalatitserusuttoq peqatigineqarsinnaalluni, oqarpoq.

Toqqaannartumik yoga

Yogarta Nuuk, ilitsersuisoqarluni yogartitsisartoq, toqqaannarluni 45 minutsit atorlugit yogartitsilluni misiliissamaarpoq.

- “Qaqqaq Muhammedimukanngippat, taava Muhammed qaqqaliartariaqassaaq.” Saaffiginnissimanissi kingorna misiliinialerpunga. Yoga pingasunngornermi nal. 17.00-17.45 maanngaanniit toqqaannartumik ingerlatissavarput, ilitsersuisoq Maliina Abelsen Yogarta Nuuk Facebookiani allappoq.

 

 

Yogarta Nuuk Sermitsiaq.AG-mut nassuiaavoq ualimut toqqaannarnissaq misiliinerussasoq. Iluatsissappalli, soqutiginnittoqarluassappallu, yogamik ilitsersuisut misileeqqikkusussinnaasut.

Pigisat atorneqarsinnaapput

Crossfit Inuami piginneqataasoq Camilla Nymand Petersen uterfigigutsigu, taanna nassuiaavoq timigissarnermi pisattat pisiallu atorluarneqarsinnaasut.

- Issiavimmut ingittarlutit nikueqqittarlutillu squaterit. Sungiusarnerit uteqqittaruk. Immuk liiteri pannakaassialluunniit poortat kivittaarlugit timigissarit. Puussiat pisianik immerneqarsinnaapput kivittaarlugillu. Meeqqat aamma kivittaarsinnaavatit, Camilla Nymand Petersen oqarpoq.

- Pingaarnerpaavorli timersornerup nukissamik tunisinissaa, nukissaajassartitsissanngilaq. Timersorneq nuannaartitsilertariaqarpoq, ukkassisinnaanissamillu tunisilluni, Camilla naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER