Mattusimasarnissamut malittarisassat atuutsinneqaqqilersut
Unnuap qeqqaniit atuutilersumik, Danmarkimit tikinnermit ulluni 14-ini mattusimasarnissamut imaluunniit tikinnermit ullut tallimat qaangiunnerani misissorteqqittarnissamut piumasaqaatit atuutseqqinneqalissapput. Piumasaqaatit tamanut atuutissapput - inunnut aqqaneq-marlunnik ukioqalerersimasunuinnaanngitsoq.
Danmarkimi coronap tuniluukkiartuinnarnera pissutigalugu mattusimanissamut malittarisassat ukioq manna siusinnerusukkut atuussimasut atuutsinneqaqqilerput.
Tassa Kalaallit Nunaannut tikinnermi ulluni 14-ini mattusimasoqartassaaq imaluunniit tikinnermit ullut tallimat qaangiunneranni kingusinnerusukkulluunniit misissorteqqittoqartassaaq.
Kalaallit Nunaannut angalanissamut akuerineqassagaanni, kingusinnerpaamik aallarfissaq ullunik tallimanik sioqqullugu tunillatsissimannginnermut uppernarsaammik takutitassaqarnissaq suli piumasaqaataavoq.
Maannali malittarisassaq taanna tamanut atuutissaaq, tassa inunnut aqqaneq-marlunnik ukioqalereersimasuinnarnut atuukkunnaarluni. Malittarisassaq atuutsinneqalersoq ikaarsaariarfeqartinneqassaaq, taamaammat oktoberip arfineq-appaanni aatsaat atuutsinneqalissalluni.
Qanermut assiaquteqarnissaq
Kiinarpaat qanermullu assiaqutit sumi qaqugukkullu atorneqartassanersut aamma erseqqissaatigineqarpoq. Inuit aqqaneq-marlunnik ukioqalereersimasut tamarmik timmisartumilu sulisut qanermut assiaqummik aamma/imaluunniit kiinnamut assiaqummik atuisassapput, immikkut akuerisat eqqarsaatigissanngikkaanni.
Timmisartut iluaniinnerini tamani, aamma nunami angalanermi atorneqartassapput, soorlu aamma timmisartoqarfimmiinnermi timmisartoqarfiillu illutaaniinneranni atorneqartassapput.
Meeqqat aqqaneq-marlunnik ukioqalersimanngitsut piumasaqaammut ilaatinneqanngillat.
Sulisut timmisartoqarfimmi assigisaannilu ilaasunik attaveqartartut aamma qanermut assiaqummik kiinnamulluunniit assiaqummik atuisassapput, tassa sulisut angalasullu akornanni plastikkiusumik assiaqusiisoqarsimanngippat.
Nalunaarut nutaaq unnuap-qeqqaniit atuutsinneqalissaaq, taamalu pingasunngornermi septembarip 30-aniit angalasunut tamanut atuutilissalluni. Meeqqanut tunngatillugu oktobarip arfineq-aappaata tungaanut ikaarsaariarfeqartitsisoqassaaq.
Illoqarfinnut nunaqarfinnullu ingerlaqqilluni angalanerit
Angalanermi illoqarfimmut nunaqarfimmulluunniit matuma kinguliani allassimanngitsunut ingerlaqqittoqassappat, tikinnermiit ullut tallimat qaangiunnerini kingusinnerusukkulluunniit misissorteqqittoqareertinnagu ingerlaqqittoqassanngilaq. Aatsaat apuuffissamut ingerlaqqittoqarsinnaavoq, COVID-19-imik tunillatsissimannginnermut uppernarsaat tiguneqarpat.
1) Avannaata Kommuniani:
a) Ilulissat
2) Kommune Qeqertalimmi:
a) Aasiaat
b) Qasigiannguit
c) Qeqertarsuaq
3) Qeqqata Kommuniani:
a) Kangerlussuaq
b) Maniitsoq
c) Sisimiut
4) Kommuneqarfik Sermersuumi:
a) Nuuk
b) Paamiut
5) Kommuni Kujallermi:
a) Narsaq
b) Narsarsuaq
c) Qaqortoq