Mattak inuttassaarunneqartoq: Siornatigut taamatut pisoqarnikuunngitsoq
RAL-imit paasisaqartoqarsimanngilaq, sulilu mattak 118 kilo uninngasuutigineqarluni.
RAL-imit mattammik 118 kilomik piginnittoq nassaariniarlugu sapaatip-akunnerata ataatsip matuma siornatigut saqqummiussisoqarpoq.
Sermitsiaq.AG-mit suliami nutaarsiassaateqartoqarnersoq paaserusunneqarsimavoq.
Kristian Frohnili RAL-imi pisortaasoq ajoraluartumik pakatsisitsivoq.
- Saaffiginnittoqarsimanngivippoq, taanna oqaluttuarpoq.
Kristian Frohn ilisimatitsivoq, RAL-imit sapaatip-akunneranik ataatsimik periarfissiisoqaqqissimasoq.
- Mattak 118 kilo qanoq iliuuseqarfigissanerlugu isummertinnata, nalunaaruteqarnissamut piffissaliussap qaangiunnissaa utaqqimaarparput.
Piginnittoq nassaariniarlugu sapinngisamik iliuuseqartoqarsimasoq
Pisortap nassuiaatigaa, taamatut pisoqarnera nalinginnaanngilluinnartuusoq.
- Maanna killiffitsinni oqaatigisinnaavarput, tammatut ittumik siornatigut pisoqarsimanngisaannartoq.
Taassuma ilisimatitsissutigaa, RAL-imit piginnittoq nassaariniarlugu sapinngisaq tamaat iliuuseqartoqarsimasoq.
- Nassiussatut uppernarsaatit inniminniissuterpullu misissorsimavagut. Atortorissaarutitsinni piginnittuusinnaasoq, nassiussisimasoq tigusisussarlu nassaariniarlugit eqqaasinnaasavut tamaasa ujarsimavagut, taanna oqarpoq, nangillunilu:
- Periarfissaasinnaasut tamaasa misissorsimavagut. Sapaatip-akunnerani ataatsimi utaqqimaaqqilerpugut.
Nassiussaq illit pigingukku qinnuigineqarputit, nassiussatut uppernarsaat mailikkut Claim-ip immikkoortortaqarfianut nassiuteqqullugu - Tamatumunnga peqatigitillugu qinnuigineqarputit mattak suminngaanniit qangalu nassiunneqarsimanersoq kiisalu qanoq poortorneqarsimanersoq ilisimatitsissutigeqqullugu, RAL-imit inuttassarsiuillutik allapput.