internetti

Massakkut pillagaanngikkaluarlutit killeqanngitsumik internettersinnaalerputit

Nuummiit Aasiannut imaatigut kabelip tallineqarnera inuinnaat internettimik atuisut kiisami malugisinnaalerpaat

Tele-Posti inuinnaat atuisut internettimik nutaanik nioqquteqarfigilerpai, tassani atuinissamut isumaqatigiissutaasimasoq sinnersimagaanni immikkut akiligassiisoqartassanngilaq.

Pingaarnersaa

Nioqqutinimi nutaani pingaarnersaavoq akeqanngitsumik atuisinnaalerneq assigiinngitsunik pingasunik sukkassutsit assigiinngitsunik akillit. Tassa datamik atuivallaarnikkut immikkut akiligassinneqarnissaq eqqarsaatiginngikkaluarlugu Netflix, Youtuve kanalillu allat atorneqarsinnaalerput.

- Ukiumi ataatsimik piareersaasiorluni suli taamatut nioqquteqalernermik kinguneqarpoq, Tele-Postimi sullitanut pisortaq, Brian Smedemark nassuiaavoq. Nioqqutit pinasut assigiinngutsinik pingasunik 2,10 imaluunniit 30 M/bit-imik sukkassuseqarput, qaammammullu 499,-, 1099,- aamma 1199,- koruunit akigitinneqarput. Data-t qaraasiannut qanoq sukkatigisumik ingerlasarnerat M/bit-inut nassuiaataapput. Tassa kisitsit qaffasinneruppat nittartakkat, assit filmillu sukkanerusumik download-ersinnaasssavatit.

Imaatigut kabelimik nutaamik aningaasaliinerit annertuut Avannaanilu sakkortusaavinnik annertusaasimanerit Kitaani innuttaasut internetti sukkanerusoq atorsinnaalissavaat.

Ullumikkut innuttaasut 37 procentii sukkasuumik atuisinnaapput. Sulinerlu ukiuni tulliuttuni naammassineqarpat, 92 procenti anguniagaavoq.

Nuummi malunnaatilimmik pitsanngoriaat

Kujataani illoqarfiillu pingaarnersaanni internettimik atuisut sukkassutsip 10 M7bit-miik 30 M/bit-mut sukkatsinneqarnissaa pissutigalugu, malunnaatilimmik pitsanngoriaateqarnera malugissavaat.

Illoqarfiit imaatigut kabelimut atassuteqartut 4 M7bit-miik 30 M/bit-mut sukkanerusumik atuisinnaalernissaq pissutigalugu malunnaateqangaatsiartumik pitsanngorsaavigineqasssapput.

Illoqarfinnilu tallimani netværkimik nalimmassaanerit kingulliit amigaatigineqarneri pissutigalugu, neriorsuutigineqartuni 30 M/bit atorsinnaanngikkallarpaat. Teknikimik iluarsartuussinerit 2018-ip ingerlanerani naammassineqassapput. Piffissallu ingerlanerani taakku pitsanngoriaateqassapput tassa 4 M/bit-miik 10 M/bit-mut pitsanngorsaasoqassammat.

Illoqarfiit uku sukkanerpaamik suli atuisinnaassanngillat:

  • Kangerlussuaq
  • Nanortalik
  • Narsaq
  • Paamiut
  • Uummannaq

Atuisut, internetti atugartik naammagisimaarunikku ingerlatiinnarsinnaavaat. Atuisulli nutaat flatrate-t nutaat pingasut toqqarsinnaassavaat.

Pisariillisaaneq

- Pisariillisaaneruvoq. Pisariillisaaneq anguniangaraarput, taamaasiornikkut sipaaruteqassaagut atuisunulli akikinnerusumik neqeroorsinnaassalluta, sullitanut pisortaq paasissutissiivoq.

Taanna erseqqissaavoq, imminut sullinnerunissat siunissami anguniarneqartoq, tassani atuisut imminut sullinnerulissapput, tamatumalu kingunerissavaa ingerlatseqatigiiffimmik sulisunik ikilisaaneq.

- Atuisut imminut sullissinnaanngitsut eqqarsaatigalugit, 15-inik atuisunut kiffartuussiveqarpugut, sullitanut pisortaq oqarpoq.

Kaaviaartitat ikileriarnerat

Nioqqutini nutaani akigitinneqartut kingunerissavaa inuinnarnut internettimik niueruteqarnermi kaaviaartitat ikileriarnissaat, aningaasat 10 million koruunit eqqartorneqarput.

- Akitsuutit assigiinngitsut peerneqarnerinut tamatumunnga pissutaavoq. Tassa pisariillisaaneq eqqaaqqippara. Atuisulli data-mik atuivallaarsimatillugit atorunnaarpata isertitassaraluagut annaassavagut, pisortaq nassuiaavoq.

Ingerlatseqatigiifiup anguniakkani pingaarneq oqaatigiumanngilaa. Atuisut qanoq amerlatigisut ingerlaannaq nioqqutinit qangarnitsaniit nutaanut nuussanersut unammillernartuuvoq, tassani nioqqutit akisuutut isikkoqarsinnaangaluarluti, imminut sanillersuunnerini akisugisassaanngitsut, oqaaritineqarpoq. PIngaaruteqartutulli allatut taaneqarsinnaavoq internettimik neqeroorutini nutaani unammillertit qanoq iliuuseqassanersut.

Suliffeqarfiit tullinnguuttut

Piffissami kingusinnerusumi suliffeqarfinnut internettimik nioqqutit nutaat Tele-Postip suliffeqarfinnut neqeroorutigilissamaarpai.

- Inuinnaat aallartilluarnissaat pingaarnersaangallarpoq. Ingerlallualeriarutta suliffeqarfiit tulliukkumaarpagut, Brian Smedemark erseqqissaavoq.

Ullumikkut Tele-Postip internettimik atuisut 12.000-iupput.

Powered by Labrador CMS