Martin Møller OL-imut peqataalerpoq

Martin Møller maanna aappassaanik OL-imut peqataanissamut qilanaarsinnaanngorpoq.

- Maanna Korea Kujallermi OL-imut piareerpunga. Anngulluni misigissuseq nuannerluinnarpoq, taamaalillungalu OL-ernissamut sungiusarsinnaanngorpunga, taanna Sermitsiaq.AG-mut mailikkut allappoq.

Martin Møllerip danskit OL-imut piumasaqaataa Italiami decembarip 16-anni World Cupimi arpannermini anguaa. Maanna PyeongChangimi februaarimi peqataanissamut qilanaarpoq.

Ammaanersiorneq februaarip 9-anni pissaaq, ullut marlullu qaangiutiinnartut Martin Møller 30 kilometerisut takissusilimmi arpassaaq. Kingornalu februaarip 16-anni 15 kilometerimut, februaarip 24-anni 50 kilometerimut.

- Maani Nuummi aputeqarpallaanngilaq, kisianni naatsumik løjpeqarpugut, ullormut marloriarlunga sungiusarfigisarpara. Ullormut 50-60 kilometerertarpunga, Martin Møller allappoq.

- Maani Nuummi januaarip 25-ata tungaanut sungiusassaanga. Ukiuni sisamani kingullerni tamaani sungiusartarpunga, tamanna allanngorpallaarnavianngilara.

Januaarip 25-ata kingorna Martin Møller ulluni qulingiluani Østrigimiissaaq, tassani OL sioqqullugu World Cupimut kingullermut peqataassaaq.

- Apummut sungiussipallannissaq aamma pingaaruteqassaaq. Løjpit nalinginnaasumik manngernerusarput. Maani Nunatsinni sungiusimasatsinnit aput sisuffigiuminarnerusarpoq.

- Korea Kujallermi aputip qanoq innera pissanganarpoq.