Martha: Sakkortunerusumik pineqaatissiisoqartalissaaq

Pinerliinerit ilungersunarluinnartut sakkortunerusumik pineqaatissiissutaasalissapput, Inatsisinik Atuutsitsinermut Naalakkersuisoq Martha Abelsen nalunaaruteqarpoq

Martha Abelsenip Kalaallit Nunaanni pinerluuteqarsimasunut pineqaatissiisarnerup allangortinneqarsinnaanera nalunaarutigaa, oqaatigalugulu danskit pinerluttulerinermik inatsisaata assilisinissaa pisariaqarsinnaasoq, tassa toqutsinerit, peqqarniitsumik persuttaasimanerit ukiukinnerusunillu kinguaassiuutitigut innarliisimanerit sakkortunerusumik pineqaatisiissuutaasalersillugit.

- Inatsisartuni amerlanerussuteqartut isumaqarput maanna pineqaatissiissutaasartut ullutsinnut naleqqukkunnaarsimasut, Martha Abelsen Kalaallit Nunaanni maanna pillaariaatsimik allanngortitsiniarneq pillugu nassuiaavoq.

Illoqarfissuarmi eqqarsartariaaseq

- Sakkortuumik pinerluuteqartoqasimatillugu illoqarfissuarni eqqarsartariaaseq Kalaallit Nunaanni atuutilersimavoq, eqqartuussivitsinnilu sakkortunerpaamik ukiuni qulini pineqaatissiisoqartannginnera tupigusuutigineqarsinnaavoq, Martha Abelsen oqarpoq, nangillunilu oqaatigalugu sivisunerpaamik ukiuni arfineq-pingasuni pillaasarnissaq aalajangersagaasoq.

- Taamaakkaluartoq innuttaasut amerlassusaat eqqarsaatigalugit, piffissami killiligaanngitsumi pineqaatissinneqarsimasut inissiisarfiiniittussanngorlugit eqqartuunneqarsimasut amerlassusaasigut rekortileeqqavugut. Tamatumani naapertuutinngittoqarpoq, inatsisinik atuutsitsinermut akisussaasoq, siorna justitsministeriusimasumut Søren Pape Poulsenimut saaffiginnissimasoq erseqqissaavoq.

Søren Pape Poulsenimut, kalaallit pineqaatissiissutaasartut sakkortusineqarnissaannik kissaateqarnerannik isumaqataasumut saaffiginnittoqarnerata kingorna folketingimut qinersisoqarsimavoq, maannalu socialdemokraatineersoq Nick Hækkerup Martha Abelsenip suliamut atatillugu ilannguttussanngorpaa.

Akissut akuersaarneqarsinnaanngitsoq

Nick Hækkerup 2019-imi juullinngitsiartoq Martha Abelsenimut allagaqarpoq, tassani nassuiaatigaa inissiisarfinni inissat naammanngitsut, inissiisarfinnillu nutaanik sanaartorneq akisuupilussuussasoq, tassa pineqaatissiissutaasartut sakkortusineqassappata tamanna kingunerisinnaagaa.

- Akissutaa akuersaarneqarsinnaanngilluinnarpoq. Takkorluulaariarsiuk Nick Hækkerupip danskit innuttaasuinut nalunaarutigisuuppagu, toqutsisimasut politikkikkut aalajangersakkat malillugit pillarneqarsinnaannginneri pillugu taamatut tunngavilersuisuuppat qanoq nilliatigisoqartigissagaluartoq. Kalaallit Nunaanni inuuneq Danmarkimi inuunertulli naleqartigaaq, Martha Abelsen erseqqissaavoq.

Martha Abelsenip oqaatigaa, Kalaallit Nunaat inatsisinik atuutsitsinermut tunngatillugu danskit oqartussaasuinik suleqateqarluartoq, suleqatigiinnerlu tamanna pinngitsoorani ingerlatiinnarneqarniartoq.

- Akissutaa akuersaarnianngilluinnarpara, martsillu qaammataani Nick Hækkerup ataatsimeeqatigilerukku apeqqutip qaqileqqinnissaa pilersaarutigaara, Martha Abselsen ilisimatitsivoq.

Marthap oqaatigaa ajornartorsiutaasartut assigiinngitsut qulaajaaffiginiarlugit misissuisoqassasoq, peqatigitillugu neriuutigaa, dankit pinerluttulerinermik inatsisaa assigalugu pineqaatissiisalernissap isumatusaartuunera pillugu Kalaallit Nunaanni oqallittoqalerumaartoq, tassa pinerliinerit assigiinngitsut qanoq sakkortutigineri apeqqutaatillugit pillaasoqartalernissaa oqallisaajumaartoq.

Sakkut nutaat

- Pinerluuteqarsimasut sakkortunerusumik pillarneqartalernissaat kisimi pineqanngilaq. Pinerliisoqarsinnaanera pinngitsoortinniarlugu sakkussanik nutaanik aamma nassaarniartariaqarpugut. Tamatumunnga peqatigitillugu pineqaatissinneqarsimasut innuttaasunut qanoq akuulerseqqinneqarsinnaanerat misissussavarput, Martha nassuiaavoq, oqaatigalugulu toqutsisimasutut eqqartuunneqarsimasoq illoqarfimmut nunaqarfimmulluunniit pinerluffiusimasumut nalinginnaasumik uteqqinneq ajortoq.

Martha Abelsenip oqaatigaa, Eqqartuussiveqarnikkut Ataatsimiititaliarsuaq suliamut peqataatinneqassasoq, ataatsimiititaliallu sulinerminut innuttaasut peqataatissagai. Kissaat ataatsimiititaliamik oqaloqatiginnissutigissallugu piareersimaffigivaa.

Politikkikkut aalajangiinissaq

- Misissuereerutta, immikkuualuttullu tamaasa qulaajareerutsigit, politikkerit suup tungaanut ingerlassanersugut inaarutaasumik aalajangiiffigissavaat, Martha Abelsen oqarpoq.

Powered by Labrador CMS