Martha: Nuummi persuttaasoqarnerulerpoq - qimarnguinni inissat amerlineqarput
Martha Abelsenip innuttaasut oqartussat innersuussutaannik malinnittut qutsavigai, aammali ilisimatitsissutigalugu Nuummi angerlarsimaffinni persuttaasarnerit amerlanerulersimasut.
- Inuiaqatit pillugit iliuuseqaqataasut tamaasa qutsavigerusuppakka. Immitsinnut paarisariaqarpugut, taamaaliorsinnaaniaruttalu immitsinnut ingalassimasariaqarpugut. Sunngiffimmi sammisassagut killeqarput, amerlasuujullutalu ataatsimoorsinnaanngilagut, Martha Abelsen oqarpoq.
- Corona ilaannut kingunerluuteqarpoq. Meeqqat ernumasinnaapput. Tamanna pillugu oqarasuaatikkut siunnersuinermik pisariaqartitsilerpoq, meeqqat ernumagunik apeqqutissaqarunilluunniit sianersinnaasunngorlugit, Martha Abelsen ilisimatitsivoq.
- Meeqqat ernumagunik uagutsinnut, tassa 801180-mut attaveqaqqullugit. Attavigineqarsinnaavoq nalunaaqutaq 8.00-miit unnukkut nalunaaqutaq 22.00-imut. Coronavirus allaluunniit ernumagigaanni tassunga attaveqartoqarsinnaavoq.
Angerlarsimaffinni persuttaasoqarnerulersoq
- Taakku saniatigut meeqqat aamma ukkatarivagut, nun.gl-ilu ilaqutariinnut meerartalinnut paasissutissanik peqarpoq. Nuummi ajoraluartumik angerlarsimaffinni sapaatit akunnerni kingullerni persuttaasoqarnerulernera misigaarput, kommunimilu qimarnguiit maanna ulikkaaqqapput. Taamaattumik isumaqatigiissusiorpugut, qimarnguik amerlanerusunik inissaateqalerniassammat.
- Meeqqat ilaannut tamanna isumaqarpoq angajoqqaat imigassartornerulernerat, toqqissisimananngitsumilu angerlarsimalerneq. Allat aamma annertuumik eqqugaapput – soorlu utoqqaat, inuit innarluuteqartut angerlarsimaffeqanngitsullu. Kommunit maanna oqaloqatigineqarput, inuiaqatigiinni eqimattat taakku sullinnwqarnissaat pillugu, tamannalu nuannaarutigaara, Martha Abelsen oqarpoq.
- Piffissaq manna allaanerulluinnartoq ajunnginnerpaamik kinguneqartinniartariaqarparput. Meeqqat peqatigalugit sammisaqaqatigisigit, ulluinnarni samminissaanut piffissaqarfiginngisasi aallussigit, oqarpoq.
Peqqinnissaqarfimmi pissutsit
- Peqqinnissaqarfimmut immikkut aningaasaliinissaq akuerineqarmat nuannerpoq. Pisut aallaqqaataanniilli Peqqinnissaqarfik malinnaavoq, tunillaassortoqalernissaanullu piareersimalluni, Martha Abelsen oqarpoq.
- Sulisut tamarmik coronamik tunillatsissimasumik sullissinissamut piareersarneqarput. Covid-19-imik napparsimasut avinngarusimatinneqarlutik uninngavissaannik pilersitsisoqareerpoq – nakorsiartunut allanut ingalassimatinneqarsinnaasumi. Dronning Ingridip Napparsimmavissuani tallimanik peruluttunut uninngavissaqarpoq. Pisariaqartinneqassappallu, sulisutigut naammassinnaappat, uninngaviit taakku anersaatuusersuutitallit 13-ininngorlugit amerlineqarsinnaapput. Napparsimmavinni allani uninngaviit tallimat piareersimatinneqarput. Peqqissaavinnilu illoqarfinni minnerni init marluk aamma piareersimatinneqarlutik, Martha Abelsen ilisimatitsivoq.
Atortut naammanngippata, soorlu napparsimasut anersaartuusersorneqartariaqartunut – napparsimasut Dronning Ingridip Napparsimmavissuanut aallarunneqartassapput.
Taanna eqqissisaavoq ilisimatitsilluni regionshospital Nordjylland suleqatigineqarmat, atortunik nassiussuinissamut qulakkeerinnittoqarsimalluni.
Nakorsat soraarninngornerit kaammattorneqarput
Naalakkersuisoq kaammattuivoq nakorsat peqqissaasullu soraarninngorsimasut nunatsinni sumiittulluunniit nalunaaqqullugit, Peqqinnissaqarfimmi pisariaqartitsisoqalissagaluarpat ikiuunnissamut piareersimaniassammata.