Martha: Coronavirusi ulorianarnerpaat ilagaat
Namminersorlutik Oqartussat coronavirus nappaatit tuniluuttut ulorianarnerpaat allattorsimaffiannut ilannguteqquaat. Tunillaassortunik nappaalanersuaqarneranut ataatsimiititaliarsuup pisariaqartinneqartunik aalajangiinissaanut tamatuma inatsisitigut tunngavissiinissaa qulakkiissavaa.
Peqqissutsimut Naalakkersuisup Martha Abelsenip nalunaarut nutaaq tusarniaassutigalugi nassiuteqammerpaa, tassani tusarniaanermut akissutit kingusinnerpaamik tunniunneqarnissaannut nalinginnaasumik sapaatip akunnerinik sisamanik piffassaqartitsisoqartaraluartoq, sapaatip akunnerinut marlunnut sivikillineqarsimavoq.
- Tusarniaaneq sapaatip akunneranut marlunnut sivikillineqarpoq, sapaatip akunneranut sisamanut tusarniaanermut killigititap saneqqunneqarnissaanut pisut immikkuullarissut tassani pissutigineqarput. Taassuma saniatigut tusarniaassutit annertoorsuunngillat, peqqussummut ilanngussaq 1-imi nappaatip taaguutaanut kisimi ilaassuteqartoqarmat, Peqqissutsimut Naalakkersuisoqarfimmit tunngavilersuutigineqarpoq.
Iliuutsit
- Nalilerneqarpoq Coronavirus allassimaffik A-mi nappaatinut tamanut ulorianartunut ilanngunneqassaa naleqquttusoq. Ulloq 30. januar 2020, Coronavirus nutaaq pissutigalugu, WHO-p nalunaarutigaa nunarsuarmi tamarmi ajornartoortoqartoq. Kalaallit Nunaanni tunillatsissinnaaneq appasittutut nalilerneqarpoq, kisianni soorunami pingaaruteqarpoq Tunillaassortunik nappaalanersuaqarneranut ataatsimiititaliarsuaq Nappaatit tunillaassortut akiorniarlugit iliuutsit pillugit Inatsisartut peqqussutaat nr. 20, 12. november 2001-imeersoq tunngavigalugu pisinnaasat tunngavigalugit aallartisarnissaanut periarfissaqarnissaa.
Nappaatit allattorsimaffik A-miittut:
Kuppit
Tyfusi aappaluttunik anillatsitsisartoq (ulorianartoq)
Kissarneqaqqilersitsisartut (Tilbagefaldsfeber)
Pest
Pupinneq
Marburg-sygdom
Lassa-feber
Ebola
Anersaartorniarnermik ajornartorsiuteqarneq (Svær Akut Respiratorisk Syndrom (SARS))
2019 Corona Virus (2019-nCoV)
Nappaatit allattorsimaffik B-miittut:
Kolera
Tyfusi
Paratyfusi
Salmonellamik tunillatsinnerit
Aattalimmik anartarneq
Nukillaarneq
Meningokok-meningitis
Meningokok-sepsis
Tuberkulose
Sungaparlanneq tuniluuttoq
Verotoxin-producerende Escherichia Coli (VTEC)
Methicillin-restistente Staphylococcus Aureus (MRSA)
Tusarniaanermut akissutit tunniunneqareersimassapput februaarip 21-ani.