Martha: Amerlanerusunik aningaasaliineq aqqutissaanngilaq
Peqqinnissaqarfimmi unammilligassat annertuut immikkut ittunik amerlasuunik iliuuseqarnikkut iluarsineqassaput, oqaloqatigiinneq aamma ilaatitsineq pingaarutilittut oqaatigineqarlutik. Naalakkersuisoqatigiit amerlanerusunik aningaasaliinissaq salliutinngilaat.
Peqqissutsimi kisitsisit takussutissat mianersuussassat aaqqillugit ikilisinneqarnissaat amerlasuutigut iluatsinnikuunngillat. Imminut toquttartut amerlassusaat, kinguaassiutitigut nappaatit, naartuersittarnerit aamma kræfterluni toqusartut inuiaqatigiinni suli unammilligassat ilagaat.
Iliuuseqarfiit amerlanerusut
Suliassaq aaqqiivigiuminaappasikkaluartoq, Peqqissutsimut Naalakkersuisoq Martha Abelsenip nakimanngitsumik nipeqarluni nukissaqarpasilluni peqqissutsimut naalakkersuisoqarfiup suliniutai siammasissut saqqummiuppai, taakku maratonerluni arpattartup sungiusarluarsimasulluunniit qasussutigisinnaavai.
Tamanna ullumi marlunngornermi tusagassiortunik katersortitsinermi pivoq.
Aningaasanut inatsisissami peqqinnissaqarfimmut aningaasanik amerlanerusunik immikkoortitsisoqarsimannginnera pakatsissutigaajuk?
- Naamerluinnaq. Aningaasat sorliit sulisoqarnermut aamma passussinermut toqqaannartumik atorneqartarnersut qulaajassallugit pingaaruteqarpoq. Aningaasat amerliartuinnartut pisussaatitsinngillat, Martha Abelsen oqarpoq, sutigut immikkut ittumik iliuuseqartoqarnissaat qulaajassallugu pingaaruteqartoq taassuma naqissuserpaa.
Uppernarsaat
- Pisariaqartitsisoqarnera uppernarsarsinnaagutsigu, aningaasanik amerlanerusunik immikkoortitsisoqarnissaa qularutiginngilara, naalakkersuisoq isumaqarpoq.
Tamanna sioqqullugu qanoq pilersaarnermik nalunaarutit, misissuinerit, nassuiaanerit aamma pilersaarutit arlallit saqqummiuppai, taakku ataatsimut qulequtalerlugit suliarineqarput: Suleqatigiinneq aqqutigalugu peqqinneq.
- Peqqinnissaqarfiup atuisui naammagisimaarinninnerannik misissuitsitsineq 2019-imi aallartinneqassaaq
- Maalaartarfik arjornannginneq oqaloqatiginninnerunermik ukkassisoq
- Kommunit, inuussutissarsiutillit, peqatigiiffiit aamma innuttaasut suleqatigineqarnerat nukittorsarneqassaaq
- Nakorsat aamma peqqissaasut aalaakkaasumik atorfeqartinnissaannut sulisussarsiornermullu periusissiaq suliarineqassaaq
- Kræfti pillugu nalilersuineq aallarsiarneqarpoq
- Imminut toquttarneq pillugu pitsaaliuneq ingerlateqqinneqassaaq
- Atoqatigiinnikkut peqqissuuneq ukkatarineqassaaq, inuusuttut naligalugit, tamatuma naartuersittarnerit aamma kinguaassiutitigut nappaatit ikilisissavaat
- Inooriaatsimut tunngasunik nappaatit iliuuseqarfigineqarnerat Novo Nordisk Fonden suleqatigalugu nukittorsarneqassaaq
Peqqinnissaqarfimmi sullissineq oqallisigineqassaaq
Suliaqartut aamma innuttaasut peqatigalugit Nunatsinni peqqinnissaqarfimmi sullissineq oqaluuserineqassasoq, Martha Abelsenip oqaatigaa.
- Nunassittarnerput immikkuullaringaarmat, sumi tamaani nakorsaqarsinnaanngilagut. Qanoq ililluta pitsaanerpaamik peqqinnissaqarfimmi sullissineq pitsaanerpaaq pilersissanerlugu oqaluuserissavarput, Martha Abelsen oqarpoq.
Nakorsanik peqqissaasunillu amigaateqarnerup peqqinnissaqarfik unammillernartoqartippaa, taamaattumillu naalakkersuisoqarfiup nunanit allanit Danmarkimiinnaanngitsoq ilisimasalinnik ujartuinissaq isumaliutersuutigaa.
Nakorsat Polenimeersut
- Nakorsanik assersuutigalugu Polenimeersunik tikisitsineq aaqqiissutaasinnaava. Aap, oqaatsinut aamma oqalutsinik pisariaqartitsinermut tunngatillugu ajornartorsiutinik allanik pilersitsiva, Martha Abelsen oqarpoq, taassuma peqqinnissaqarfimmi sulisut maanna sulisinnaatitaanerannut periuseq danskit periusaat assiginagu allanngortinneqassanersoq qulaajartikkusuppaa.