Kommunimut qinersineq 2017

Martha Lund Olsenip Inatsisartunit tunuarnissaminut piareersimasoq

Borgmesteri marloqiusamik qinigaaffeqarani imaluunniit saniatigut allamik suliaqarani borgmesteriusariaqarpoq. IA-mi siulittaasoq Sara Olsvig kommunimut qinersineq sioqqullugu taama naqissusiivoq.

IA-mit borgmesterit marloqiusamik qinigaaffeqassanngitsut aamma saniatigut suliaqassanngitsut, Sara Olsvigip naqissuserpaa.

MALUGIUK: Sara Olsvigip oqariartuutaanut Martha Lund Olsenip oqaaseqarneranik allaaserisaq nutarterneqarnikuuvoq, aaqq.

- Kommunit tamarmik nukittuunik borgmestereqarnissaat Inuit Ataqatigiinnut pingaaruteqarluinnarpoq. Borgmesterit innuttaasunik sullissinermik salliutitsisut kommuninilu aqutsilluarnermik pingaartitsisut inuiaqatigiit atorfissaqartippavut. Taamaammat Inuit Ataqatigiit erseqqissumik nalunaarutigissallutigu pingaartipparput borgmesteriutitassavut marloqiusamik qinigaaffeqarlutik issiassanngimmata, Sara Olsvig naqissusiivoq.

Siunnersuut Martha Lund Olsenimut sammitinneqartoq
Illoqarfiit pingaarnersaanni kommunimut qinersinissamut pissanganartumut oqariartuuteqarneq tunngasoq qularnanngilaq, tassani Martha Lund Olsen Siumumit qinigassanngortippoq.

Siumumit qinigassanngortittoq Inatsisartunut ilaasortaareerpoq, Martha Lund Olsenillu maanna borgmesteri IA-meersoq, Asii Chemnitz Narup, pissaaneq nikisinneqassappat borgmesteriujunnaartissinnaagaa amerlasuut siulittormassuk.

Martha Lund Olsen: Isumaqataavunga
Sara Olsvigip oqariartuutaanut Martha Lund Olsen ima oqaaseqarpoq:

- Inatsisartunut ilaasortaanerup saniatigut borgmesteriusoqarsinnaannginneranik oqariariartuuteqarnera isumaqatigaara. Borgmesterinngussagaluaruma Inatsisartuni taamaatissaanga. Tamanna qularutigineqassanngilaq, Martha Lund Olsen Sermitsiaq.AG-mut oqarpoq. Ilanngulluguli oqaatigaa, Siumut illoqarfiit pingaarnersaata kommuniani arlalinnik qinigassanngortitaqartoq oqaatigaa, Siumumiillu borgmesterinngortitsisoqassat nammineq toqqagaariinnginnerarpoq.

Saniatigut allamik aamma suliffeqarnissaq borgmesterinut tulluanngitsoq, Sara Olsvig oqarpoq.

- Inuit Ataqatigiit borgmesterit borgmesteriunertik saniatigut allamik suliffeqannginnissaannik piumasarput aamma attapparput. Siorna ukiaanerani Inatsisartut ataatsimiinneranni taama saqqummiussivugut, kommunit kattussuunneqarneranni borgmesterit akisussaaffii suliassaallu kattussuutinnginnerannut sanilliullugu annertuumik annertuseriarput. Ullumikkut borgmesteriuneq ulloq naallugu atuuffittut naatsorsuunneqartariaqarpoq. Tamanna borgmesterit akissarsiaasa annertussusaat pillugu malittarisassani naleqqussarneqarpoq. Kommunalbestyrelsit taamaalillutik borgmesterit ukiumut 918.000 kr-it angullugit akissaasersinnaavaat, Sara Olsvig tusagssiuutinut nalunaarummi oqarpoq.

Soqutigisat aporaannissaat unitsittariaqartoq
Borgmesterip taanna kisiat suliarippagu, taassuma soqutigisat aporaassinnaanerannut aarlerinaammik killiliinissamik tunngaveqarnerarpaa.

Powered by Labrador CMS