Martha Lund Olsen atorfimminut qinnuteqaqqissanerluni nalorninerartoq

Kommuneqarfik Sermersuumit aalajangiunneqarsimavoq, Meeqqanut Ilaqutariinnullu Ingerlatsivimmi pisortatut atorfik inuttassarsiuunniarlugu, tassa maanna pisortasup Martha Lund Olsenip ukiuni aalajangersimasuni atorfeqartup pisortatut atuuffiata sivitsornissaanut taarsiullugu. Tamanna tunngavigalugu pisortap ingerlaqqissanerluni eqqarsaasersuutigaaa.

Siumumi politikkeriusimasoq Isumaginninnermullu Naalakkersuisuusimasoq Martha Lund Olsen Kommuneqarfik Sermersuumi Meeqqanut Ilaqutariinnullu Ingerlatsivimmi ukiuni kingullerni sisamani pisortaasimavoq, tassani ukiut aalajangersimasut atorfeqartussatut isumaqatigiissuteqarsimalluni.

Ukiunik sisamanik killilimmik atorfeqartitsineq, kommuni atorfimmik inuttassarsiuussisoqartinnagu ukiunik pingasunik sivitsorneqarnissaanik kommuni periarfissaqartarpoq.

Kommuneqarfik Sermersuumilli atorfik inuttassarsiuunneqassasoq aalajangiunneqarsimavoq, tamatumalu malitsigisaanik Martha Lund Olsenip siunissani eqqarsaasersuutigilersimavaa.

- Immaqa allamik misiliinissamut piffissanngorpoq, pisortaq Sermitsiaq.AG-mut oqarpoq.

- Oqaatigisinnaavara, atorfik inuttassarsiuutinngitsuuppassuk ukiuni pingasuni ingerlaqqissimassagaluarpunga. Periarfissakka maanna eqqarsaasersuutigaakka, atorfimmulli qinnuteqaqqissanerlunga suli aalajanginngilanga, taanna oqarpoq.

Suli tunniussassaqartoq

Martha Lund Olsenip oqaatigaa, atorfimmi suli tunniussassarpassuaqarluni.

- Tunngavissaq maanna inissisimalerparput. Ukiut sisamat matuma siornatigut sulilerama pissutsit pitsaavallaanngillat. Pingaartumik Tasiilami sulisussarpassuarnik amigaateqartoqarsimavoq. Maanna pitsaanerusumik ingerlalersimasoq isumaqarpunga.

Oktobarip aallaqqaani tarnip pissusaanik ilisimasalik ataaseq psykoterapeutillu pingasut Tasiilami atorfinitsinneqassapput, sulisullu arlallit maannakkorpiaq ilinniarteqqinneqarlutillu piginnaanngorsaqqinneqarput. Nuummi meeqqat inuusuttullu atugarliortut ikiorserniarlugit aqqusinermi sullissisartunut, inuusuttunik siunnersuisartunut inuusuttullu ornittagaannut ikiuuttartussat, toqqissisimanissaq pillugu angalaaqatigiit, pilersinneqarsimapput.

- Ukiualuit qaangiuppata inuit ilinniakkaminnik naammassippata Tasiilaq sinnerlugu isumalluarpunga. Najukkami nukkit atorlugit suliassamik kivitsisoqarsinnaanera qularnannanngilaq. Inuiaqatigiit innuttaasullu taakku nalunngilaat aamma nukissarpassuaqartoqarpoq, pisortaq oqarpoq.

Martha Lund Olsen Tasiilaq pillugu tv-kkut piviusulersaarutip saqqummiunneqarneranut atatillugu isornartorsiorneqarsimavoq, illoqarfimmilu inuusuttut ornittagaanni pilersinneqaqqammersumi sulisut arlallit aqutsisunik suleqateqarniarnermik ajornartorsiuteqartoqarnera pissutigalugu, sivikitsuinnarmik sulereerlutik illoqarfimmiit aallarnissamik aalajangersimanerannut atatillugu isornartorsiorneqarsimalluni.

Suli nalornissuteqartoq

Pisortalli suliassaq suli naammassineqarsimanngitsoq ilisimaarivaa.

- Meeqqat pillugit suliassarpassuaqaraanni soorunami aaqqitassaqartaqaaq. Nuummi meeqqat pillugit suliat 1000-it missaanniittut Tasiilami 450-it missaanniipput, Martha Lund Olsen ilisimatitsivoq.

Martha Lund Olsen atorfimminut qinnuteqartunut ilaassanerluni suli oqaatigerusunngilaa.

- Periarfissakka suli eqqarsaasersuutigaakka, taanna oqarpoq.

Qinnuteqaammik kingusinnerpaamik tunniussiffissaavoq septembarip aqqaneq-aappaat.

Powered by Labrador CMS