Skip to main content

Martha Abelsen: Tasiilami aallartissaagut

Tasiilami ikiuinitsinni misilittagarilikkavut nunamut tamarmut siammarterneqassapput

5,3 millioner koruunit, danskit naalakkersuisuisa Kalaallit Nunaanni meeqqat atugarliortut ikiorneqarnissaannut immikkoortissimasaat Tasiilami ikiuigasuartussanut atorneqassapput.

- Ikiuigasuartussat sapinngisamik piaarnerpaamik aallartinneqassapput, Peqqissutsimut Isumaginninnermullu Naalakkersuisoq Martha Abelsen (S) Sermitsiaq.AG-mut erseqqissaavoq.

Ikiuigasuartussat tassaasut isumaginninnermi siunnersortit, tarnip pissusaanik ilisimasallit ilaqutariinnillu katsorsaasartut, illoqarfimmi meeqqat atugarliortut sullinneqarnerinut katsorsarneqarnerannullu ikiuutissapput. Suliaqartussat taakku Danmarkimi paarlattaasussarsiortarfiit aqqutigalugit pissarsiarineqassapput, taakkulu tunngavigalugit ikiuigasuartussat katiterneqassallutik. Pineqartut inissaqartinnissaat Kommuneqarfik Sermersuup akisussaaffigaa.

- Uannut pingaaruteqarpoq erseqqissaatigissallugu, suliassami annertoorujussuarmi manna siullertut alloriarnerusoq, Martha Abelsen oqarpoq.

- Meeqqanut inuusuttunullu suliassaqarfimmi unammilligassat tamaasa ataatsikkut aaqqiivigisinnaanngilagut. Tasiilaq aallartiffigivarput. Danmarkimit pinasuartumik suliniuteqarnikkut Tasiilami meeqqat inuusuttullu navianartorsiortut amerlasuut ikiorneqassapput. Kalaallit Nunaata sinnerani meeqqat inuusuttullu navianartorsiortut pillugit sullissinermi Tasiilami misilittakkat atussavagut.

- Taamatuttaaq sulianik ilisimasallit avataaneersut ilisimasaannik ilikkagaqarnissaq qulakkiissavarput, tassa taakku aallaqqippata ilisimasat nunami maani piginiassagatsigit.

Piffissaq ungasinnerusoq eqqarsaatigalugu suliniuteqarnissamut pilersaarutit

Tasiilami suligasuarnermut peqatigitillugu aqutsisoqatigiit kalaallinik danskinillu inuttallit, piffissamut ungasinnerusumut suliniutissat qanoq isikkornissaannik suliaqassapput. Aqutsisoqatigiit inassuteqaatitik kingusinnerpaamik ukiup nutaap aallartinnerani tunniutissavaat.

- Aqutsisoqatigiit taakku siumut isigisumik suliaqassapput aamma nunami tamarmi meeqqat pillugit suliaqarfiit qanoq pitsanngorsaaffigineqarsinnaanerannik siunnersuuteqassapput.

Isumaginninnermut Naalakkersuisoqarfiup, ikiorsiissutissat pineqartut sioqqullugit, kommunit tamaasa qinnuigisimavai kissaatiminnik tunniusseqqullugit. Ikiorsiiniarnerup pingajuattut Tasiilami ikiuinermut peqatigitillugu ikiuutissat taakku ingerlanneqassapput.

- Aamma tassani Tasiilami misilittagarilikkat atorneqarnerannut peqatigitillugu kommunit assigiinngitsuunerat eqqarsaatigineqassaaq.

5,3 millioner koruunit ikiuigasuartussanut atorneqarnerisa saniatigut, meeqqat inuusuttullu kinguaassiuutitigut atornerlunneqarsimasut katsorsarneqarnerisa annertusarneqarnisaanut kiisalu nunami angajoqqaarsiaqartitsisarnermi suliaqarfiup misissoqqissaarneqarneranut atorneqassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER