Martha Abelsen: Sakkukippallaamik pineqaatissiisarpugut?
Inatsisinik atuutsitsinermut naalakkersuisoq Martha Abelsen inunnut navianaatilimmik pinerluuteqarnernik soorlu nakuusernernik meeqqanillu kinguaassiuutitigut atornerluinermik suliani eqqartuussutit sivisussuserisartagaasa oqaluuserineqalernissaannik kissaateqarpoq.
Eqqartuussisoqarfik Sermersooq juullernissaanut ullunik pingasunik sioqqullugu angummik angerlarsimaffeqanngitsumik 30-t sinningaatsiarlugit ukiulimmik ukiuni arfineq-pingasuni pineqaatissinneqarsimasunut inissiisarfimmiittussanngortitsilluni aalajangiivoq.
Aviisi Sermitsiaq taama allappoq.
Angut Nuummi angummik innarluutilimmik marsimi 2018-imi peqqarneeqisumik toqutsisimasutut pisuutinneqarpoq. Eqqartuussisoqarfik toqutsisoqarnerani sakkukillisaataasinnaasunik nasssaarsinnaanngilaq, tamatumali akerlianik pineqaatissinneqartup angummik oqarasuaat angallattagaq, ikiaroornartumineq aggorsimasualuillu pillugit toqutsisimanera sakkortusaalluinnartutut isummerfigaugu.
Taamaattumik ukiunik arfineq-pingasunik pineqaatissiisoqarpoq, tamannalu Kalaallit Nunaanni nalinginnaanngitsumik sakkortulluni. Toqutsinermut nalinginnaasumik pineqaatissiissutigineqartartut ukiut arfiniliupput; pisuni ataasiakkaani ukiuni arfineq-marlunni pineqaatissinneqarsimasunut inissiisarfimmiittussanngortitsisoqartarpoq.
Pineqaatissinneqartup eqqartuussut Nunatta Eqqartuussisuuneqarfianut nangitassanngortippaa.
Ukiut arfineq-pingasut naammappat?
Kisianni peqqarniitsumik toqutsinermut ukiuni arfineq-pingasuni pineqaatissinneqarsimasunut inissiisarfimmiittussanngortitsineq eqqartuussutitut naammaginartuua?
Peqqissutsimut, Isumaginninnermut Inatsisinillu Atuutsitsinermut naalakkersuisoq Martha Abelsen isumarpoq, pinerluttulerinermik suliani eqqartuussutit qaffasissusaasa ullutsinnut naleqquttuunerannik oqallisigisinninnissamut piffissanngortoq, pingaartumik inunnut navianaatilimmik pinerlussimanerit soorlu nakuusernerit meeqqanullu kinguaassiuutitigut kannguttaatsuliornerit pineqartillugit.
– Inuit tusartuartarpakka oqartut, meeqqanut kannguttaatsuliorfiginninnermik suliani pineqaatissiissutigineqartut suunngippallaartartut. Suliallu angisuut eqqartorneqaraangata inuit tamatigut oqartarput: Taamaattoqaqqissanngilaq, taamaattoqaqqissanngilaq, Martha Abelsen Sermitsiamut oqarpoq.
Kalaallit Nunaanni pinerluttulerineq pillugu aviisimi Sermitsiami atuarnerusinnaavutit – aviisi uani ataani pissarsiarisinnaavat: