Martha Abelsen: Neriuppunga qanoq ikioqqussanerluta ersarinnerulissasoq
Danmarkimut allakkap nassiunneqannginnerani kommunit tusarneqaqqaassasut, isumaginninnermut naalakkersuisoq isumaqarpoq.
Peqqissutsimut isumaginninnermullu naalakkersuisup, Martha Abelsenip (S), naak maanna Danmarkimut qinnuiginninnissaq taperseraluarlugu, sunarpiaq qinnuiginnissutigissanerlugu suli ilisimanngilaa.
- Qinnuiginninnermut allakkap Danmarkimut nassiutinnginnerani, ilaqutariinnermut peqqissutsimullu ataatsimiititaliaq oqaloqatigeqqaassavara, qinnuiginninnerup qanoq imaqarnissaanik qulakkeerinninnermi taanna siunnersueqatigissavara, taanna Sermitsiaq.AG-mut oqarpoq.
Inatisartut isumaqatigiittut meeqqat sumiginnarneqartut iliuuseqarfiginissaat salliutinniarlugu neriorsuuteqarnerat, ataatsimut isigalugu naammagisimaarpaa.
- Ataasinngornermi oqallinnermut Inatsisartut qujaffigerusuppakka. Isumaginninnermik suliassaqarfimmi siammasissumik suleqatigiinnerput aalajangiisuuvoq, taamaalilluta meerartagut ilaqutariillu navianartumiittut pitsaanerusumik inuuneqalerniassammata. Meerartatta siunissaat pillugu suleqatigiittoqarnissaata isumaqatigiissutaanera, Naalakkersuisut nuannaarutigaat. Taamaattumik Naalakkersuisut neriuutigaat, isumaginninnikkut suliassaqarfimmi iliuusissat Inatsisartut tapersersorumaaraa, meeqqanik inuusuttunillu sumiginnaanermut nuna tamakkerlugu iliuusissatut pilersaarut ilanngullugu.
Kommunit ilanngunneqartariaqarput
Kisianni meeqqat inuusuttullu sumiginnarneqarnerinut tunngatillugu kommunit pingaarnertut akisussaasuusut, Martha Abelsenip maluginiaqqoqqippaa. Taamaattumillu Danmarkimut qinnuiginninnerup nassiunneqannginnerani, tusarneqaqqaartariaqartut taanna isumaqarpoq.
- Kommunit sinnerlugit tamanna pisussaammat peqataateqqaarnagit qinnuiginninniaruma ajorisorujussuuara, tamanna piumasarineraat qulakkeerneqaqqaassammat.
Inatsisartut inaarutaasumik juunip sisamaanni aalajangiinnginnerini, siunnersuut maanna ilaqutariinnermut peqqissutsimullu ataatsimiititaliami suliarineqassaaq.
- Toortakkamik tuugaqaannartoqarsinnaanngilaq
Piffissami tassani saaffiginnissuteqarnerup qanoq imaqarnissaa ersarinnerulersimassasoq, Martha Abelsenip neriuutigaa.
- Isumaginninnermut Aqutsisoqarfik Danmarkimi katsorsaavinnut, kannguttaatsuliortunut aamma meeqqat meeqqanik kannguttaatsuliortartunut katsorsaasartunut amerlasuunut qanimut suleqateqareerpoq. Oqallinnermi oqaatigineqartut amerlasuut ingerlanneqalereernikuupput.
- Taamaattumik ajornartorsiutip aaqqinnissaanut iliuusissarpiamik nutaamik eqqarsaateqalinngilanga.
Martha Abelsenip maluginiaqquaa, ilaatigut Kommune Kujalleq isumaginninnikkut siunnersortinit Danmarkimeersunit ikiorneqarsimasoq. Periarfissarlu taanna periarfissaajuaannarsimavoq, kisianni ajornartorsiummik aaqqiissutaanissaa qularutigaa.
- Toortakkamik tuugaqaannarluni isumaginninnikkut siunnersortit tikisillugit ajornartorsiutinik aaqqiisinnaasuuppata, taama kommunit taamaaliorsimassagaluarput.