Skip to main content

Martha Abelsen: Nakuuserneq innarliinerlu naligiissitaanermik akornusiivoq

Naligiissitaanerup ulluanut atatillugu ajornartorsiutit oqimaatsut pillugit Martha Abelsen oqaasertaliivoq

Tasiilami kisimi nakuusernerup atornerluinerullu kingunerisaanik inuunernik sequtserisoqanngilaq. Naligiissitaanissamut naalakkersuisup, Martha Abelsenip (S) naligiissitaanissap ulluanut atatillugu oqaaseqaatimini tamanna erseqqissarpaa.

- Uanga naligiissitaaneq ataqqinninnertut paasisarpara: Suiaassutsit ataqqeqatigiinnerat, assigiinnginnitta ataqqinera, inuttut assigiinnginnitta ataqqinera. Killivut assigiinngissutsivullu aatsaat akueralugillu ataqqigutsigit naligiissitaaneq periarfissaalissaaq, oqaaseqaatimini allappoq.

- Ajoraluartumik inuiaqatigiitsinni ataqqinninnermut tunngatillugu ajornartorsiuteqarpugut. Ullut tamaasa tusarparput arnat meeqqallu nakuuserfigineqarlutillu innarlerneqartut. Amerlanersavut qamuuna annerpugut TV-kkut piviusulersaarut ”Byen hvor børn forsvinder” isiginnaarlugu. Takuarput inuit ataasiakkaat killissaanik ataqqinninnginneq qanoq inuunermik aseruisartoq. Tasiilami taama pisoqartarpoq, kisianni nassuerutigisariaqarparput nunatsinni sumiiffinni amerlasuuni taama pisoqartarmat.

Kultuurip peqqinnanngitsup atorunnaarnissaanut piumasaqartoq

Oqaaseqaatimini piviusulersaarummi arnaq inuusuttoq, piviusulersaarummi oqaluttuartoq toqqaannartumik taavaa.

- Sapiissuseeruppoq, taamaalillunilu takorluukkamisut inuunissamut kiffaanngissuseerulluni. Isumaqarpunga naleqanngitsutut sapiissuseeruttutullu imminut isigilerutta naligiissitaaneq angunngisaannassallugu.

- Kulturi inuup ataasiakkaap inuuneranik aseruisartoq inuiaqatigiillu akornutigisaat unitsittariaqarput. 

- Nakuuserfigineqarsimasut inuunerminni ingerlariaqqinniassammata, naligiissitaanerup inuiaqatigiinnilu inissaqarnerup sorsuutiginissaannut sapiissuseqalerniassammata, ikiuutissat politikkikkut pitsanngorsartariaqarpavut. Minnerunngitsumillu kannguttaatsuliortut, kinguaariinnut tulliuttunut ingerlateqqinneqariaannaasartumik, iliuutsinik ajortunik unitsitsinissamut nukissaqalerlutillu ilisimassuseqalerniassammata ikiortariaqarpavut.

Martha Abelsenip ilanngullugu erseqqissarpaa arnat angutillu assigiimmik akisussaaffimmik tigusisariaqartut, meeqqat toqqissisimanartumik angerlarsimaffeqartinnissaat anguniarlugu.

- Innarliisarneq nakuusernerlu aatsaat unitsikkutsigit arnat angutillu naligiissitaanerat aatsaat angusinnaavarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER