Martha Abelsen: Kinguaassiuutitigut innimiilliornermut killisaq erseqqeqaaq

Martha Abelsen (S), naligiissitaanermut tunngatillugu naalakkersuisutut akisussaaffeqartoq kinguaassiuutiginiut kanngunarsaanermut tunngatillugu erseqqissumik oqaaseqarpoq.

- Suleqatinut qaninniartarnerit imaluunniit kanngunarsaanerit suulluunniit akuerineqassanngillat. Inuiaqatigiinni inissaqartariaqanngillat – aamma nuannataarnerni imaluunniit suleqatit akornanni ”quiasaarutigalugu” inissaqartariaqanngillat. Tamanna – naligiissitaanermut Naalakkersuisutut – kimulluunniit naqissuserusuppara, Martha oqaaseqaateqarnermini oqarpoq.

- Taamaattumik ajuusaarutigaara paasillugu, uanga nammineq partiinni arnat partiip allattaaneranit kanngunarsarneqartutut misigisimammata. Parteerput iliuuseqapallappoq, tamannalu iluarisimaarsinnaavarput. Kinguaassiutitigut naapertuilluanngitsuliornerit oqitsutut tigunngisaannartariaqarpagut.

Aamma kinguaassiutitigut innimiilliornermut killissamik nalorsartunut Martha Abelsen erseqqissumik nalunaarutissaqarpoq.

- Isumaqarpunga taamaanngilluinnartoq. Kinguaassiutitigut innimiilliornermut killissaq ersarilluinnarpoq. Killissaq tassaavoq, iliuutsit oqaatsillu tigusisumit kissaatigineqanngippata. Imaluunniit eqqugaasumut iluaatsumik, kanngunartumik imaluunniit nakkarsaalluni iliuuseqarneq anguniarneqarpat.

- Piffissanngorpoq, kulturit peqqinnanngitsut akiorniarlugit ataatsimut nikussaarnissarput. Tamanna kinguaassiutitigut innimiilliortarnermik kultureqarnermut taamaallaat tunnganngilaq, suiaassuserli tunngavigalugu naleqqutinngitsumik, kanngunarsaasumik imaluunniit nakkarsaasumik iliuuseqarnernut tamanut tunngalluni.