Martha Abelsen: Kinguaassiutitigut atornerluisoqarsimatillugu sukannernerusumik pineqaatissiisalerusuppugut
Inatsisinik atuutsitsinermut naalakkersuisoq, Martha Abelsen, meeqqat kinguaassiutitigut atornerlunneqarsimatillugit sukannernerusumik pineqaatissiisalernissaq anguniarlugu, inatsisinik atuutsitsinermut ministerimut Nick Hækkerupimut saaffiginnissimavoq.
Angutip 21-nik ukiullip niviarsiaqqamik aqqaneq-marlunnik ukiulimmik arlaleriarluni atoqateqartarsimasutut Kommuneqarfik Sermersuup eqqartuussivianit mianersoqqussummik tunineqarsimanera pillugu, inatsisinik atuutsitsinermut naalakkersuisoq Martha Abelsen (S) suliamut toqqaannartumik oqaaseqarsinnaanani Sermitsiaq.AG-mut ilisimatitsivoq.
Meeqqalli kinguaassiutitigut atornerlunneqarsimatillugit pineqaatissiissutigineqartartut sukannernerulernissaannik suliaqarnini aamma ilisimatitsissutigaa.
- Torersumik pisoqarnissaa eqqarsaatigalugu paasissutissiissutigissavara pinerluttulerinermi inatsimmi pineqaatissiissutaasartunut killiliussat sukannernerulernissaat pillugu suliamik aallartitsisoqaqqullugu Justitsministeri ukiumi massumani siusinnerusukkut saaffigisimagakku, Martha Abelsen mailikkut akissuteqarluni Sermitsiaq.AG-mut ilisimatitsivoq.
Oqallittoqartariaqarpoq
Martha Abelsenip ilanngullugu ilisimatitsissutigaa pineqaatissiisarnerit sukannernerusimagaluarpata oqaaseqarfigisinnaanagu angut 21-nik ukiulik sukannernerusumik pineqaatissinneqarsimassagaluarnersoq.
Folketingimi ilaasortat Aki-Matilda Høegh-Dam aamma Aaja Chemnitz Larsen, meeqqat kinguaassiutitigut atornerlunneqarsimatillugit pineqaatissiissutigineqartartut killiliussaasa sukannernerulernissaat pillugu, inatsisit allanngortinneqarnissaat siunertaralugu oqallittoqarnissaannik kissaateqarput.