Martha Abelsen: Kinguaassiutitigut atornerluisimasut katsorsarneqartassapput

Kinguaassiutitigut atornerlunneqartut ikinnerulersinnissaannut suliniuteqarnermut atatillugu, isumaginninnermut naalakkersuisoq kinguaassiutitigut atornerluisimasut katsorsarneqarnissaannut neqerooruteqartitsisalerusuppoq.

Kinguaassiuutitigut atornerluisarnerit ikilisinneqassappata, kannguttaatsuliortartut katsorsarneqarnissamik neqeroorfigineqarsinnaasariaqarput. Peqqissutsimut, isumaginninnermut inatsisinillu atuutsitsinermut naalakkersuisoq, Martha Abelsen (S) taama isumaqarpoq.

Katsorsaanermi suut periarfissaanersut paasisaqarfiginerujumallugit taassuma Sexologisk Klinik Københavnimiittoq pulaarsimavaa. Tassani kinguaassiuutitigut atornerluinermik pinerluuteqarsimasut namminneerlutik piumappata innersuunneqarsinnaapput, imaluunniit pineqaatissinneqarnerminnut atatillugu katsorsarneqarsinnaallutik.

- Danmarkip kinguaassiuutitigut atornerluinermik pinerluuteqarsimallutik eqqartuunneqarsimasunut neqeroorutit neqeroorutigisartagai qanoq ilillutik Kalaallit Nunaanni kinguaassiuutitigut atornerluisimanermik pinerluuteqarsimasunut aamma periarfissanngorsinnaanersut soqutigisorujussuuara misissussallugu. Kannguttaatsuliortut “toqqortarineqaannannginnissaat” uannut pingaaruteqartorujussuuvoq , Martha Abelsen tusagassiutinut nalunaarutimini oqarpoq.

Danmarkimi klinikkit taama katsorsaanissamik neqerooruteqartuusut pingasuupput, katsorsartinnerlu terapitut oqaloqateqarnermik ingerlanneqartarluni.

Ukiuni marlunni katsorsartittoqartarpoq

Danmarkimi pinerluuteqarsimasunut isumaginnittoqarfiup nittartakkamini nassuiarpaa katsorsartinneq ukiunik marlunnik sivisussuseqartartoq, katsorsarneqarnermilu sapaatit akunneri tamaasa oqaloqatiginnittoqartarluni. Kisimiilluni eqimattakkuutaarluniluunniit oqaloqatigiittoqarsinnaavoq.

Sexologiskimik katsorsaanermi pineqaatissinneqarsimasoq kinarpiaanersoq ajornartorsiullu suna pigineraa pillugu paasiniaanermi apersuinerit, apeqqutinik immersorlugit akisassanik misiliutinillu atuilluni paasiniaasoqaqqaartarpoq. Tamakku paasiniarneqareerpata katsorsaaneq qanoq ingerlanneqassanersoq aatsaat aalajangerneqartarpoq. Pineqaatissinneqarsimasup kinaassusaa iliuuserisartagaalu aallaavigalugit, kinguaassiutitigut atornerluinerup ajornartorsiutitut aallaavia unitsissallugu katsorsaaneq ingerlanneqartarpoq.

- Kannguttaatsuliortut suliapilutik pillugit oqaluuserinninnissamik periarfissaqalerunik taamaaliornermikkullu suut eqqortuunersut eqqunngitsuunersullu paasilerunikkit, taava innarliinerit nutaat pitsaaliorneqarnissaat periarfissinneqarsinnaavoq. Sivisuumik parnaarussaaqqanerup inuup pitsaanerulerneranik kinguneqartarnera misissuinernit uppernarsarneqanngilaq. Akerlianilli kannguttaatsuliortut innuttaasunut ilaalerseqqinniarlugit katsorsarneqanngippata taava nutaamik innarleeqqinnissaat ilimanaatilerujussuusarpoq, Martha Abelsen oqarpoq.

Powered by Labrador CMS