Martha Abelsenip angerlarsimaffeqanngitsut pillugit suliniut annertusarniarpaa
Sulaq maanna aaallartinneqartoq aqqutigalugu inersimasut inuuniarnikkut atugarliortut angerlarsimaffeqanngitsullu amerliartortut pillugit ajornartorsiutaasartut ukiap ingerlanerani qulaajaaffigineqassapput, kiisalu aaqqiissutissanik inassuteqaateqartoqassalluni
- Inuit amerliartuinnartut inuunermik aalaakkaasumik inuuneqarnerminnik sapangiisartut taamaalillutillu angerlarsimaffeeruttartut ilatsiinnarluta isiginnaaginnarsinnaajunnaarpagut.
Isumaginninnermut Naalakkersuisoq Martha Abelsen (S) Namminersorlutik Oqartussanit tusagassiorfinnut nalunaaruteqarnermini taamatut oqarpoq. Marthap isumaa malillugu 'angerlarsimaffeqanngitsorpassuit assut atugarliulersarnerat inuunerminnilu nakkariartuinnavittarnerat imigassamik hashimillu atornerluillutik, eqquiniarnermik nappaateqalersarlutik aamma immaqa pinerluttunngortarlutik inuuneqalersarnerat' qaangerusuppaa.
Suliatigut paasisimasallit
- Sulaq maanna aaallartinneqartoq aqqutigalugu inersimasut inuuniarnikkut atugarliortut angerlarsimaffeqanngitsullu amerliartortut pillugit ajornartorsiutaasartut ukiap ingerlanerani qulaajaaffigineqassapput, kiisalu aaqqiissutissanik inassuteqaateqartoqassalluni, tusagassiorfinnut nalunaaruteqarnermi ilisimatitsissutigineqarpoq.
Taamaammat suliamut peqataasussatut Naalakkersuisup Martha Abelsenip suliassaqarfiup iluani suliatigut paasisimasallit suliatigut ilisimasaqarlutik suliaqartartut pilersissimavai, matumani Kofoeds Skolemit, Frelsens Hærimit, qimarnguimmit ataatsimit, Ilisimatusarfimmit aamma allanit innuttaasunik pimoorussillutik ilisimasaqarlutillu sullissisartunit inuttaqartussat.
- Angerlarsimaffeerussimasunut aaqqiissutissanik nassaartoqassaaq, taamaalillutik inuunermut sulerusussuseqarfiusumut, suliffeqarfiusumut ineqarfiusumullu uterniassammata. Taamaattoqarsinnaanngippallu – immaqa atornerluineq aamma inooqataanikkut ajornartorsiutit annertuallaarneri pissutigalugit – taava innuttaasoq minnerpaaffiatut sumiiffissaminik aamma unnuakkut siniffigisartagassaminik neqeroorfigineqartariaqarpoq, Martha Abelsen oqarpoq.
Forslag til foråret
Naalakkersuisup Martha Abelsenip 2020-mi maajip qaammataani qanoq iliortoqarsinnaanera pillugu tigussaasunik siunnersuuteqarsinnaanini neriuutigaa, taamaalilluni tamatuma kinguninngua nunatsinni angerlarsimaffeqanngitsut aamma innuttaasut aarlerinartorsiortut iluaqutigisinnaasaanik politikkikkut sukkanerpaamik isumaqatiginninniartoqarniassammat.
2017-imi kisitsinerup naqissuserpaa Kalaallit Nunaanni angerlarsimaffeqanngitsut taamani 841-sut. Ullumikkut kisitsisit eqqortut ilisimaneqanngillat.