Martha Abelsen: Inersimasut inersimasutut akisussaaffimminnik tigusissapput

Inuusuttut akornanni aanngajaarniutinik atornerluinerup pinngitsoortinneqarnissaa iluatsissappat angajoqqaat peqataatinneqartariaqartut, peqqissutsimut isumaginninnermullu naalakkersuisoq, Martha Abelsen isumaqarpoq.

Inuusuttut imigassamik ikiaroornartumillu atornerluinerat unitsinneqassappat pinaveersaartitsineq katsorsaanerlu ataatsimut pilersaarutigineqartariaqarput. Meeqqat inuusuttullu aanngajaarniutinik ajornartorsiuteqartut ikiorsernissaanut suliniutip tamanna qiteraa, suliniullu Naalakkersuisunit tusarniutigineqarpoq.

Iluatsissappat angajoqqaat peqataasariaqarput, peqqissutsimut isumaginninnermullu naalakkersuisoq, Martha Abelsen (S) oqarpoq.

- Isumaqarsinnaasarpugut pinaveersaartitsinermi siunnersorti atorfinitsikkutsigu taassuma ajornartorsiutit tamaasa aaqqissagai. Issiaannarluni aaqqiisoqarnissaanik utaqqiinnarneq taamaatittariaqarparput, Sermitsiaq.AG-mut oqarpoq.

Angajoqqaat ilinniartinneqarnissaat inuusuttut kissaatigaat

Naalakkersuisoqarfiup meeqqat atuarfiini atuartunik misissuinini naammasseqqammerpaa, misissuinermi pinaveersaartitsineq eqqartorneqartunut ilaavoq. Akissutit pissarsiaasut ilagaat, inuusuttut misigisimasut oqaluuserisassat ajornakusoornerumaat, soorlu atornerluineq kinguaassiutitigulluunniit kannguttaatsuliornerit, angajoqqaat meeqqaminnut oqaluuseriuminaatsittaraat.

- Inuusuttut oqarput pitsaasuusoq pinaveersaartitsineq pillugu ilinniartinneqaramik; aammali oqarput angajoqqaat tamassuminnga ilinniartittariaqarigut.

- Inuusuttut namminneq taama oqarnerat assut eqqarsariarnaraara, Martha Abelsen (S) erseqqissaavoq.

Taanna oqarpoq ilisimallugu angajoqqaarpassuit maanna akisussaaffimminnik tigusisinnaanngitsut. Iliuuserineqartartulli amerlisinnagit aaqqissuussaanerup tamarmiusup allanngortinnissaa taassuma siunnersuutigaa.

- Inuit ima eqqarsalersittariaqarpagut: Qanoq ilioruma ingerlariaqqissinnaavunga? Inersimasut inersimasutut akisussaaffimminnik tigusisariaqarput.

Ilaqutariit tamarmiusut qitiutinneqassapput

Tamanna angujumallugu siunissami suliniutini meeraq kisimi qitiutinneqassanngilaq, aammali meeqqap tunuliaqutai, soorlu ilaqutaasut, atuarfik paaqqinnittarfiillu peqataatinneqarnerulertariaqarput. Suliamik suliarinnittut tallimaatinngikkaluarlugit, ilaqutariit ataatsimoortutut isigineqarnerulertariaqarput.

- Angajoqqaat angajoqqaajunissaannut pisortat qanoq ikiuussinnaanersut isiginiarnerulertariaqarparput. Illoqarfinni tamani ilaqutariinnut illoqarpugut, nutaaliorfigigutsigillu taakku suliniummi qitiulluinnartuusinnaapput.

Martha Abelsen isumaqarpoq ajornartorsiutinik aaqqiisoqassatillugu nukiit pisuussutillu pioreersut isiginiarneqarnerusariaqartut, Danmarkimiit, Islandimiit nunanit allaniillu ilaarsiinnarneq iliuutsinik atorunnaarlugu.

- Nukiit sumiiffimmiittut assigiinngitsorujussuupput, apeqqutaalluni sumi illoqarfimmiinneq, soorlu Nuuk, Kangaatsiaq, Qaqortoq allamiluunniit. Sumiiffinni ajornartorsiutip aaqqinnissaanut nukiit pigisagut aallaavigisariaqarpagut.

- Ilaqutariit akisussaasuunerat qitiusariaqarpoq, pisortallu tassani amigaateqartoqartillugu aaqqiiniarnermi tapersiisariaqarput.

Martha Abelsen isumaqarpoq taamaasiornikkut kalaallit namminneq periusitaarsinnaasut, inuiaqatigiinnut ikitsunnguanut ilaqutariillu ataqatigiissaarnerannut tulluartumik.

- Taassuma kingorna pingaaruteqarpoq takusassallugu sutigut pitsanngorsaasinnaanersugut.

- Kukkussutigisanit ilinniarneq ulorianartuunngilaq.

Powered by Labrador CMS