Martha Abelsen: Allanngortiterineq akisussaassuseqarneruvoq

Peqqinnissaqarfiup iluani allanngortiterisoqarneranut atatillugu aningaasaqarnerup kingunissaanik naatsorsuisoqarsimannginnera pillugu demokraatineersup Anna Wangenheimip isornartorsiuinera, peqqissutsimut naalakkersuisup Martha Abelsenip illuatungilerpaa.

Peqqissutsimut naalakkersuisup, Martha Abelsenip (S) Anna Wangenheimip (D) isornartorsiuinera paasiuminaatsippaa. Anna Wangenheimip naalakkersuisoq isornartorsiorpaa oeqqinnissaqarfiup iluani allanngortiterinermi aningaasaqarnerup kingunissaanut naatsorsuusiortoqarsimannginnera pillugu.

Anna Wangenheim, Inatsisartuni ilaasortaq aamma Inatsisartuni peqqissutsimut ataatsimiititaliami ilaasortaq, isumaqarpoq peqqinnissaqarfiup iluani allanngortiterinermi aningaasaqarnerup kingunissaanik naatsorsuisimannginneq akisussaassuseqanngitsumik ingerlatsinerusoq.

Naapertuilluartuunngilaq

Martha Abelsen isumaqarpoq Anna Wangenheim (D) assuarliinera naapertuilluartuunngitsoq. Anna Wangenheimimmi peqqinnissaqarfiup iluani allanngortiterisoqarnerata qanoq akeqarnissaanik ilisimasaqannginneq akisussaaffeqanngitsutut iliornermik taavaa, isornartorsiuinerli naalakkersuisumit paasiuminaatsinneqarpoq.

- Siullermik Peqqinnissaqarfimmi qullersat aningaasanik atorluaaniarlutik - aningaasartuutinillu annertusaaniaratik taama allannguipput. Tamatuma saniatigut napparsimasut aqqusaartugassaasa pitsannguuteqartinneqarnerat utaqqisunillu ikilisaaneq, aningaasatigut nalileruminaapput - taamaakkaluaq ataatsimut isigalugu taama allannguineq aningaasartuuteqarnerulernermik kinguneqassanngilaq, Martha Abelsen tusagassiutinut nalunaaruteqarluni allappoq.

Martha Abelsen ilanngullugu allappoq peqqinnissaqarfimmi allanngortiterineq pisariaqartoq, peqqinnissaqarfimmut piumasaqaatit annertusigaluttuinnarmata, aningaasallu atugassaritinneqartut killeqarmata. Allanngortiterinermi anguniarneqarpoq napparsimasut nakorsartittarnerisa pitsaanerulernissaat, sivikinnerusumillu utaqqisoqartalernissaa.

Pingaarnersiuisariaqarneq

- Peqqinnissaqarfimmit kiffartuussinikkut nakorsaanikkullu tunniussinnaasariaqakkatut innuttaasunit piumasaqaataasut ukiuni makkunani annertusiartuinnarput.

- Ajoraluartumik nakorsartinnernik kiffartuussinernillu - innuttaasut maanna kissaataannik siunissamilu kissaatigilerumaagaannik tamaasa eqqarsaatigalugit neqerooruteqarsinnaanissap akissaqartinnginnera nassuerutigisariaqarparput. Tamanna nunatsinniinnaanngitsoq- nunanili allani aningaasaqarnerup nakorsaanermi neqeroorutinut nutaanut siuarsimasunullu angummassinnaannginnera atuuppoq. Taamaammat uagut politikeritut pingaarnersiuisariaqarpugut. Tamanna pisariaqarpoq, Martha Abelsen oqarpoq.

Attuumassuseqanngillat

Anna Wangenheim Sermitsiaq.AG-mi allaaserineqareersumi erseqqissaavoq innuttaasut paasisariaqaraat sooq kigutit narlorsartinneqarnissaannut aamma nammineq pisuussutiginngisamik naartusinnaanngitsut IVF-imik nakorsartinneqartussat akiliunnissaannut Naalakkersuisut akissaqannginnersut. Martha Abelsen erseqqissaavoq peqqinnissaqarfiup iluani allanngortiterineq kigutit narlorsartinnissaannut neqeroorutinut imaluunniit IVF-imik nakorsartinnerit uninnerinut attuumassuteqanngitsoq.

Piffissaq qaninnerusoq tikillugu kigutit narlorsartinnissaannut neqeroorutit killeqarsimapput. Kigutilli narlorsarlugit bøjlelersuisarneq nuna tamakkerlugu neqeroorutaalissappat, tamanna ukiumut 20 milliuunit koruuninik akeqassaaq. IVF-imik nakorsartinnerni aamma nakorsiartut angalanertik ineqarnertillu namminneerlutik akilertaraluarpaat, nakorsartinneq Namminersorlutik Oqartussat akileraat. Immikkoortitsinnginnissarli anguniarlugu Namminersorlutik Oqartussat angalanermik ineqarnermillu akiliisariaqassapput. Aningaasassaqanngikkallarlutilli.

- Ilaqutariinnermut Peqqissutsimullu Ataatsimiititaliaq pissutsit– naartusinnaanngitsunik naartulersitsiniaasarnerup kigutinillu narlorissaanissamik neqeroorutip atorunnaarsinneqarnerat – taakkununngalu patsisaasut pillugit ilisimatinneqareerpoq. Taamaammat politikkikkut ilisimatitsissutaasimannginneraalluni isornartorsiuineq paasisinnaanngilara. Naalakkersuisut nakorsartinnernik Peqqinnissaqarfimmi aningasartuutissatut missingersuutinik sippuinermik kinguneqartussanik neqeruunnginnikkut akisussaassuseqarneq qulakkeerniarpaat. Akerlianik iliorneq isumaga naapertorlugu akiusaassuseqanngitsumik iliornerussaaq, Martha Abelsen naggasiivoq.

Powered by Labrador CMS