Skip to main content

Martha Abelsen: Ajornartorsiutinik nassuerutiginninneq peqqinnartuuvoq

Nunatsinni isumaginninnikkut suliani ajornartorsiutit pillugit Danmarkimit ikiuunneq isumaginninnermut Naalakkersuisup naammagisimaarpaa. Pisariaqartillugu ikioqqusinnaaneq peqqinnartuuvoq, Martha Abelsen oqarpoq.

Kalaallit Nunaata isumaginninnermi suliassanik naammaginartumik kivitsisinnaannginnerminik nassuerutiginninnera, inuiaqatigiinnut kalaallinut peqqinnartuuvoq.

Isumaginninnermut Naalakkersuisoq, Martha Abelsen taama isumaqarpoq, oqarlunilu isumaginninnerup iluani nunarput siusinnerusukkut immaqa kukkusimasoq.

- Nunatsinni isumaginninnerup iluani ajornartorsiutit pillugit Danmarkimut ikioqqusimanerput, nunatsinnut peqqinnartuusoq isumaqarpunga. Ikioqqunissaq pillugu saaffiginninnissaq siornatigut eqqarsarnartoqartissimavara, maannali takusinnaavara taama iliorneq eqqortuusoq, Martha Abelsen (S) tallimanngornermi tusagassiortunik katersortitsinermi oqarpoq.

Taassuma suleqatini, danskit isumaginninnermut ministeriat, Astrid Krag (Soc.) peqatigalugu, kalaallit qallunaallu suleqatigiiffigalugu nalunaarusiaat, meeqqat inuusuttullu pillugit ikiuunnissamut16-inik innersuussutinik imaqartoq, tallimanngornermi saqqummiuppaa.

- Avataaniit ikiorneqarnissamik maanna pisariaqartitsivugut, qujavungalu ikiorneqarumagatta. Aammali erseqqissassavara pingaaruteqarmat eqqaamassallugu, siunissami suliaqarfik nammineerluta akisussaaffigalugu isumagissagatsigu, avataanit ikiorneqarata. Tassunga aamma piareersassaagut, oqarpoq.

Kalaallinut aaqqiissutissaq

Dansit isumaginninnermut ministeriat Astrid Krag tusagassiortunik katersortitsinermi erseqqissaavoq Danmarkimi suliniutit iluatsittut Kalaallit Nunaannut nuutsiinnarlugit ilaarsiinnartoqassanngitsoq. Kalaallit Nunaanni ajornartorsiutit unammilligassallu pillugit nunamut tulluarsakkanik aaqqiissusiortoqassaaq, oqarpoq.

- Danmarkimi suliniutit iluatsittut Kalaallit Nunaannut nuutsiinnarnissaat eqqarsaatigisimanngilarput, nunanimi allani iluatsittut imaanngilaq suni tamani iluatsissasut. Kalaallit inuiaqatigiit soorunami aallaavigineqassapput, aaqqiissutissanik suliaqarnermi. Aaqqiissutissat pillugit qanimut suleqatigiippugut, Astrid Krag oqarpoq, Tasiilamilu suliniutit assersuutigalugit.

Pinasuartumik iliuuseqarnermi sulisut Tasiilamut siorna suliartorput. Isumaginninnermut siunnersortit, perorsaasut, katsorsaasut allallu, Danmarkimeersut kommunimeersullu suleqatigiillutik kommunimi suliassat ikilisarlugit suliaraat, katsorsarneqarnissamillu pisariaqartitsisut sullillugit.

Suliaq qanimut malinnaavigineqassaaq

Astrid Kragip erseqqissarpaa suliniutit Kalaallit Nunaata ingerlatissagai, danskillu aningaasaliissutaat sumut atussanersut nunatta aalajangissagaa. Suliarli qanimut Danmarkip malinnaaviginiarpaa:

- Suliaq qanimut malinnaavigissavarput, kisianni soorunami Kalaallit Nunaat, kalaallillu naalakkersuisui taakkuupput suliamik ingerlatsisussat. Tamanna ataqqilluinnarparput, Astrid Krag oqarpoq.

- Nalunaarusiat aaqqiissuteqartoqartariaqarneranik imaqartut, innersuutillu arlallit saqqummiunneqareerput, taakku atuareerpagut. Taava sooq innersuussutit uku iluatsikkumaartut naatsorsuutigissavarput maanna iluatsissasoq?

- Ilumoorpoq suliaqarfimmi aaqqitassaqartoq arlalitsigut nalunaarusiorneqartareerpoq. Uanili oqarsinnaavugut, inuiaqatigiinni isuma allanngorsimavoq. Malugisinnaavarput inuiaqatigiit allannguerusuttut, aaqqeerusuttut. Ajornartorsiuteqartoq nassuerutigaarput, aamma oqarsinnaalerpugut naagga, kinguaassiutitigut atornerluinerit akuerinngilagut. Taamaattumik upperaara allanngortoqassasoq, Martha Abelsen oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER