Marsimi krateri Qaqortumut atsiunneqarsimasoq
Tysklandimi professorip Marsimi kratererujussuaq 20 kvadratkilometerisut angitigisoq Kujataani illoqarfimmut Qaqortumut atsiussimavaa.
Allattoqarfimmi pisortaq Max Heilmanna Larsen qaammatit arlallit matuma siornatigut immiikkuullarissumik eqqumiilaartumillu professorimit Martin Voelkerimit mailikkut allagarsisimavoq, tassani professori Marsimi krateri aalajangersimasoq Qaqortumut atsiunniarlugu, Qaqortoq pillugu immikkuualuttunik apeqquteqarsimavoq.
- Aallaqqaammut isumaqaraluarpunga maili asuleertumik nassiussaasoq. Angutilli tunuliaqutaa erseqqinnerusumik misissuiffigingakku paasinarsivoq ilumoorluni allassimasoq, Europallu rumagenturiani ESA-mi Marsi pillugu immikkut ilisimasalittut sulisuusoq, Max Heilmann Larsen Sermitsiaq.AG-mut oqaluttuarpoq.
Kommunip professori tyskiusoq oqaloqatigalugu aallartissimavaa, professorip atatsimiititaliamut Marsimi kraterinik atsersuisartumut, Qaqortoq pillugu immikkuualuttut pillugit uppernarsaasussaasimamma.
Qaqortoq nillertorlu
- Najugatsinni katersugaasivik Asiarlu ikiorsiullutik paasissutissat pisariaqartinneqartut pissarsiaraavut, qaammatialuillu ingerlareersut mailikkut allagarsivugut, ilimatitsissutigineqarluni atsiussaq akuerineqarsimasoq kraterillu maanna aterilersimagaa Qaqortoq, Max Heilmann Larsen oqaluttuarpoq.
Professori Martin Voelker Kalaallit Nunaanniinngisaannarsimavoq, Kujataali kusanartorsuaq tusarsimavaa, oqaaserlu Qaqortoq qaqortumik isumaqarmat, Marsimi silaannaq nillertuinnavissuaq eqqarsaatigalugu taamatut atsiussinissaq naleqquttuusoq isumaqarsimalluni.
- Tamanna tulluussimaarutigeqaarput, pingaartumik immikkut ittumik Qaqortumik nersorinninniutaammat, taanna oqarpoq.
- Pisimasoq quianarlunilu nuannerpoq, soorunami inuulluaqquniarlugu naatsorsuutigisimanngisatsinnillu suliarisimasaanik qujassuteqarfiginiarlugu allaffiginissaa eqqarsaatigisimavarput, Max Heilmann Larsen oqaluttuarpoq.