Marokkomi marlunni toqutsisutut pasisat sisamat tigusarineqartut
Arnat marluk skandinaviamiut toqutaasimanerannut tunngatillugu angutit allat pingasut aamma tigusarineqarsimasut, paasiniaasartunit ilisimatitsisoqarpoq.
Arnaq qallunaaq arnarlu norgemeersoq Marokkomi toqutaanerannut atatillugu pasisat allat pingasut tigusarineqarput.
Paasiniaasartunit ilisimasaqartut nutaarsiassaqartitsivimmut AFP-mut ilisimatitsipput.
Marokkomi nunanut allanut tunngasunut ministeriaqarfik marlunngormat ilisimatitsivoq inuk ataaseq tigusaasimasoq. Suliamut tunngatillugu maannamut inuit sisamat taamaasillutik tigusaasimalerput.
Angutit pingasut pasisatut tigusarineqartut, tigusarineqartoq siulleq assigalugu, Marokkomi illoqarfimmi Marrakeshimi tigusarineqarput.
Angutit ingasaassiniarlutik islamisiortutut eqimattamut ilaasutut pasisaapput.
Arnat marluk toqutaanerat videoliaralugu immiunneqarsimasoq internettikkullu siammarterneqarsimasoq, PET pingasunngornermi unnukkut uppernarsaavoq.
Ministeriunerup, Lars Løkke Rasmussenip, oqarnera naapertorlugu, paasisat aallaavigalugit toqutsinerit peqqarniisaarniarnerusutut isigineqarput.
Qallunaaq, Louisa Vesterager Jespersen, 24-nik ukiulik, ikinngutaalu arnaq norgemiu Maren Ueland, 28-nik ukiulik, nunami pisuttuartarfimmi, illoqarfeeqqap Imlilip ungasinngisaani tupertillutik toqutaasimasut ataasinngormat nassaarineqarput.
PET pingasunngornermi nalunaarummini allappoq, toqutsinerit peqqarniilluinnarsimasut.
- Arnat marluk sussuteqanngitsut peqqarniilluinnartumik toqunneqarsimapput.
Danmarkip Marokkomi aallartitaa maanna illoqarfimmi Marrakesh suliamullu tunngatillugu marokkomiunik qanimut attaveqarfeqarluni.
Naalagaaffiup politiivi sulisumik ataatsimik Marokkomut aallartitsereersimalerput, taannalu suliap naammassinissaanut ikiuutissallutik.
Video toqutsisoqarnerani immiussaasimasoq oqartussanit suli uppernarsarneqanngilaq.