Marmelade nunatsinneersoq nioqqutaalilersoq
Nunatsinni pisiniartartut nunatsinneersunik paarnanik kigutaarnanillu marmeladelianik Brugsenimi, Pisiffimmi niuertarfinnilu allani pisisinnaalingajalerput.
Neqi A/S nunatsinneersunik paarnanik kigutaarnanillu ukioq manna marmeladeliorpoq. Nioqqutissat illoqarfinni anginerusuni Brugsenimi aamma Pisiffimmi, kiisalu Narsami niuertarfimmi Kangerlussuarmilu akitsuusernagu niuertarfimmi pisiarineqarsinnaalissapput.
Paarnat Narsarmiini Alluitsup Paanilu siorna nunianneqarput, qeriteriarlugillu Neqi A/S-imut Narsamiittumut assartorneqarsimallutik. Neqi A/S-imi toqoraavimmi sulisut aasaanerani sulinngiffeqarnerani marmerladeliortoqarpoq.
KNI nittartakkamini taama allappoq.
- Neqi A/S Innovation South Greenlandilu nunaqarfinni marlunni ukioq kingulleq paarnartartitsipput. Neqi A/S-illu paarnat marmeladeliarivai pisiniarfinnilu aalajangersimasuni tunisassiarinissaat tullinnguuppoq, KNI nittartakkamini allappoq.
Neqaarnianngorniat marmeladeliorput
KNI ilisimatitsivoq Neqip neqaarnianngorniartui ukioq manna marmeladeliortuusut. Neqilianik nakkutilliinermut oqartussat suleqatigalugit marmeladeliornissamut toqqammavissat isumannaarneqarsimapput.
Marmelade qaammatialuit qaangiuppata nioqqutaalissapput.