Skip to main content

Marlunnik toqutsinermi eqqartuussut: Angut piffissaligaanngitsumik tigummigallarneqartussatut pineqaatissinneqarpoq

Angut 22-nik ukiulik Maniitsumersoq angummik arnamillu siorna toqutsisimasutut sisamanngornermi piffissaligaanngitsumik tigummigallarneqartussatut pineqaatissinneqarpoq. Angutip eqqartuussut suliassanngorteqqippaa.

Maniitsumi angutip arnallu toqunneqarnerat pillugu eqqartuussineq Qeqqata Eqqartuussisoqarfiani uani sapaatip-akunnerani suliarineqarpoq, tassani eqqartuussisoqarfik ullumi sisamanngornermi eqqartuussuteqarpoq.

Angut 22-nik ukiulik Maniitsumeersoq decembarip 17-anni 2019-imi angummik arnamillu toqutsisimanerminut piffissaligaanngitsumik tigummigallarneqarnissamik pineqaatissinneqarpoq, Nunatsinni Politiit tusagassiuutinut nalunaarutaanni tamanna atuarneqarsinnaavoq.  

Peqqarniitsorujussuarmik toqutsineq
Angut 55-nik ukiulimmik savinnik assigiinngitsunik minnerpaamik timaatigut 39-riarlugu kapillugu toqutsisimasutut unnerluutigineqarpoq, aammalu niaquatigut annertuumik persuttarsimallugu, taamatullu aamma tassunga atatillugu arnamik 51-nik ukiulimmik ilaatigut savinnik assigiinngitsunik timaatigut minnerpaamik 70-eriarlugu kapillugu niaquatigullu persuttarlugu toqutsisimasutut unnerluutigineqarpoq.

22-nik ukiulik aamma angummut maanna toqoreersumut unnummi tassani nakuusersimasutut unnerluunneqarpoq.

Unnerluussisussaatitaasut ilaatigut suliap peqqarniinnera, aamma 22-nik ukiullip pinerluttup eqqarsattaasianik naliliineq tunngavigalugit, piffissaligaanngitsumik tigummigallarneqartussatut pineqaatissinneqassasoq piumasaqarput.

- Toqutsinerit peqqarniitsorujussuit pineqarput, taamaattumillu unnerluutigineqartoq inatsimmi pineqaatissiissutit sakkortunersaannik pineqaatissinneqassasoq eqqartuussivimmut piumasaraara, tassa piffissaligaanngitsumik tigummigallarneqassasoq, politeeq Peter Skibye-Lotz, eqqartuussivimmi unnerluussisutut suliamik ingerlatsisoq taama oqarpoq.

Arnamut naartusumut nakuusertoq
Eqqartuussiviup nakuusernermut tunngasumi aamma inunnik marlunnik toqqutsisutut angut pisuutippaa. Tamatuma saniatigut angutip piffissaligaanngitsumik tigummigallarneqarnissaanik eqqartuussisoqarfiup unnerluussisussaatitaasut isumaqatigaat.

- Eqqartuussisoqarfiup unnerluussutip immikkoortuini marlunni unnerluunneqartoq pisuunerarpaa, piffissaligaanngitsumillu tigummigallarneqartussanngorlugu pineqaatissinneqarnissaa aalajangiullugu, inernera naammagisimaarpara, Peter Skibye-Lotz oqarpoq.

Angut arnamut naartusumut nakuusersimasutut ukioq manna januaarimi Nunatta Eqqartuussisuuneqarfiani ulluni 60-ni pineqaatissinneqarsimasut inissiisarfianiittussanngorlugu pineqaatissinneqarsimavoq, tamannalu aamma eqqartuussisoqarfiup suliamik naliliineranut ilaavoq.

Eqqartuussut suliassanngorteqqikkaa
22-nik ukiullip unnerluunneqartup illersuisuatalu pineqaatissiisoqarnerata kingorna eqqartuussisoqarfiup eqqartuussutaa Nunatta Eqqartuussisuuneqarfianut suliareqqitassanngortippaa, sakkukillineqarnissaanik piumasaqarlutik. Unnerluussisussaatitaasut eqqartuussisoqarfiup eqqartuussutaata atortussaatillugu suliassanngortitseqqipput.

- Eqqartuussisoqarfiup uppernarsaatitut inerniliussaata aalajangersimaneranik tamanna isumaqarpoq, Nunattalu Eqqartuussisuuneqarfia taamaammat taamaallaat pineqaatissiissummut aalajangiissaaq, unnerluutigineqartoq nakuusernermut toqutsinernullu pineqaatissinneqassalluni, tamanna oqaatigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER