Marlunngornermi tunillatsissimasut 42-t nutaat
Ataasinngornermi nutarterisoqarneraniilli PCR-imik misissuinikkut tunillatsissimasut 42-t paasineqarput.
Upernavimmi tunillatsittoq ataaseq, Ilulissani sisamat, Qasigiannguani ataaseq, Aasianni arfinillit aamma Nuummi 30-t tunillatsissimasut paasineqarput. Nakorsaaneqarfik nun.gl-imi taama ilisimatitsivoq.
Nakorsiaq ataaseq sivikitsumik Qasigiannguit Peqqissaaviani Covid-19-imik napparsimalluni uninngasoq angerlartinneqarpoq.
Qasigiannguani inunnit 59-init tunillatsittunit misissuipallannernit paasineqartunit PCR-imik misissuinerit akissutitai suli pissarsiarineqanngillat.
Peqqissaavimmi ulapittoqartoq
Qasigiannguani ulapittoqarpoq, peqqissaavimmi immikkoortortami peqqissaasoq, Lotte Pilûnguak Reimer, Sermitsiaq.AG-mut oqaluttuarpoq.
- Novembarip 24-anni pisut pinartuunngitsut matunissaat aalajangiupparput. Ilaatigut peqqissaavimmi tuniluunneq pinaveersaartinniarlugu, sulisugut kiisalu utoqqaat nakorsiartullu sanngiitsut covid-19-imit illersorumallugit, taanna oqaluttuarpoq.
Maannakkorpiaq Fackimit Danmarkimit illoqarfimmiittoqarpoq, taakku illoqarfiup innuttaasuinik misissuigasuarput, peqqissaaviullu taakku ikiorpaat.
Qasigiannguani nakorsaqanngilaq, kisianni immikkoortortami peqqissaasoq suleqatinilu saniatigut peqqissaavimmi sulisussanik utaqqisaqarpoq, taakku peqqissutsimut naalakkersuisup Kirsten Fenckerip sapaatip-akunnerata siuliani tikinnissaat neriorsuutigaa.
Innuttaasut oqarasuaat 911121 aqqutigalugu peqqissaavik suli attavigisinnaagaat, Lotte Pilûnguak Reimer oqarpoq, nalunaaqutallu 16.00-ip kingorna kiisalu weekendini nalliuttunilu pisarnertut Aasiannut sianertoqartassaaq, oqarasuaat 89221-mut.
- Illoqarfiup peqqissaaviani ulloq unnuarlu suli sulisoqarpugut, kisianni coronaqarnerani pissutsit aqunniarlugit allatut pingaarnersiuivugut, Lotte Pilûnguak Reimer oqarpoq.
Upernavimmi pissutsit pitsanngoriarput
Upernavimmi pissutsit ullormit ullormut pitsanngoriartorput, Avannaani immikkoortortami nakorsat pisortaat Peter Vedsted, Sermitsiaq.AG-mut oqarpoq.
- Amerlasoorpassuit peqqissisutut nalunaarutigineqareerput, maannakkorpiarlu 15-it mattusimapput. Inuit covid-19-imik ersiuteqarsinnaasut suli misissugaraagut, kisianni weekendi sioqqulluguli ataasiinnarmik tunillatsissimasumik siumugaqarpugut, taamaammat ilorraap tungaanut ingerlasoqarpoq.
Peter Vedstedip Upernavimmi periusissiap eqqortuusimanera qularutiginngilaa, peqqinnissaqarfiullu ingerlalluarsimanera nuannaarutigalugu, tassami piffissap sivikitsup ingerlanerani inuit 1000-t missaanniittut misissorneqarsimapput.
- Piffinni eqqortuni nukissat atorniarsarinissaat suli aalajangiusimavarput – tassa napparsimasunut. Iluamik ingerlasoqaannassappat, ulluinnarnut nalinginnaanerusunut ikaarsaangajalissaagut, taamaalilluta nualluummut coronamullu akiuussusersuinerit aallarteqqinnissaat isumaliutigilereersinnaavarput.
Upernavimmi Prinsesse Margrethep Atuarfia illoqarfimmi tuniluuttoqangaatsiarnera pissutigalugu sapaatip-akunnerini marlunni matoqqareerluni, 8. december ammaqqissaaq, kommunillu illoqarfimmi paaqqinnittarfiit ammaqqereerpai.